راولپنڈی (نیوز رپورٹر) اینٹی نارکاٹکس فورس نے بےنظیر انٹرنیشنل ائرپورٹ سے ابوظہبی جانے والے مسافر کے سامان سے ایک کلو ہیروئن برآمد ہونے پر اسے گرفتار کر لیا۔ ملزم کا تعلق ننکانہ صاحب لاہور سے بتایا گیا ہے۔ مسافر عرفان مسیح نجی ائر لائن کے ذریعے ابوظہبی جا رہا تھا دوران تلاشی مسافر کے ہینڈ بیگ سے ایک کلو ہیروئن برآمد ہوئی جس پر اسے فوراً حراست میں لےکر اے این ایف نے اپنے تھانے منتقل کر دیا جس سے تفتیش جاری ہے۔ بے نظیر انٹرنیشنل ائرپورٹ پر ائرپورٹ سیکورٹی فورس نے کارروائی کرتے ہوئے مانچسٹر جانے والے مسافر کے سامان سے پستول اور 28 روند برآمد کر لئے۔ ملزم افضل قومی ائرلائن کی پرواز نمبر پی کے 701 سے برطانیہ جا رہا تھا وہ آزاد کشمیر کا رہائشی ہے جسے اسلحہ کی بابت پوچھا گیا تو وہ کوئی معقول جواب نہیں دے سکا جس پر اسے گرفتار کر کے تھانہ ائرپورٹ پولیس کے حوالے کر دیا گیا۔