حروں کے روحانی پیشوا اور مسلم لیگ فنکشنل کے سربراہ پیر پگارا نے 9 مئی کے واقعے کے خلاف پاک فوج سے اظہار یک جہتی کا بیان جاری کیا ہے۔تفصیلات کے مطابق پیر صبغت اللہ راشدی نے اپنے بیان میں کہا ہے کہ افواج پاکستان ملک کی سالمیت اور استحکام کی علامت ہے، اور ہر محب وطن پاکستانی اپنی مسلح افواج کے شانہ بشانہ کھڑا ہے۔پیر پگارا کا کہنا تھا کہ پاکستان کی فوج فیڈریشن کی واحد علامت ہے، فوج نے بطور ادارہ وطن کی سلامتی، اس کے دفاع اور زلزلے اور دوسری قدرتی آفات کے مواقع پر شان دار خدمات انجام دی ہیں۔انھوں نے کہا ’’ہم اپنی مسلح افواج کی بدولت رات کو چین و اطمینان کی نیند سوتے ہیں، یہی بہادر فوج ہے جس کے افسر اور جوانوں نے وطن عزیز کی خاطر کبھی اپنی جانوں کی پرواہ نہیں کی۔‘‘پیر پگارا نے کہا فوج نے ملک سے دہشت گردی کے خاتمے کے لیے جو تاریخی کردار ادا کیا ہے وہ قابل تعریف ہے۔