لاہور(سپورٹس رپورٹر)آسٹریلین والی بال ٹیم ملکی تاریخ میں پہلی بار پاکستان پہنچ گئی۔مہمان ٹیم نحیمیا موٹے کی قیادت میں اسلام آباد انٹرنیشنل ایئر پورٹ پہنچی جہاں پاکستان والی بال فیڈریشن کے حکام نے آسٹریلین ٹیم کا استقبال کیا۔آسٹریلین ٹیم آج پریکٹس سیشن سمیت پریس کانفرنس کریگی۔ پاکستان اور آسٹریلیا کے درمیان پہلا میچ 28 مئی کو لیاقت جمنازیم میں کھیلا جائیگا، سیریز کا دوسرا میچ 29 ، تیسرا 30 مئی کو ہوگا۔پاکستان والی بال فیڈریشن کے چیئرمین چوہدری محمد یعقوب نے کہاہے کہ آسٹریلیا کیخلاف قومی والی بال ٹیم کی قیادت مراد جہاں کررہے ہیں۔ پہلی بار آسٹریلیا کی میزبانی کرنے پر خوشی ہے، مضبوط ٹیم کیخلاف بہتر پرفارمنس کیلئے پرامید ہیں، والی بال سیریز کے کامیاب انعقاد کیلئے تمام انتظامات مکمل کر لئے ہیں۔