لاکھوں کے ڈاکے، چوریاں، شیخوپورہ میں ڈیڑھ کروڑ سے زائد کی واردات 

لاہور+ فیروزوالا+ شیخوپورہ (نامہ نگار+ نمائندہ خصوصی) ڈاکوؤں اور چوروں نے متعدد شہریوں سے لاکھوں روپے مالیت کی نقدی، طلائی زیورات، موبائل فون، موٹر سائیکلیں،گاڑیاں اور دیگر سامان لوٹ لیا۔ تفصیلات کے مطابق ڈاکوؤں نے نواب ٹاؤن میں ذوالفقار کے گھر گھس کر اہلخانہ کو یرغمال بنا کر ساڑھے 5 لاکھ طلائی زیورات، موبائل فون اور دیگر سامان، باغبانپورہ کے علاقے میں حسنین اور اس کی فیملی سے اسلحہ کے زور پر 3لاکھ 75 ہزار روپے زیورات اور موبائل فون، مناواں میں اسد اسلحہ کے زور پر 65 ہزار روپے اور موبائل فون، گرین ٹاؤن کے علاقے میں تیمور سے80 ہزار اور موبائل فون، مزنگ کے علاقے میں ساجد سے 70 ہزار روپے اور موبائل فون، شاہدرہ کے علاقے میں عابد سے60 ہزار اور موبائل فون، نواں کوٹ میں ندیم سے 62 ہزار اور موبائل فون، سول لائن کے علاقے میں منیب سے 27 ہزار اور موبائل فون لوٹ لیا۔ چوروں نے فیکٹری ایریا کے علاقے میں رؤف کے گھر کے تالے توڑ کر ساڑھے 4 لاکھ روپے اور دیگر گھریلو سامان چوری کر لیا۔ چوروں نے جوہر ٹاؤن، ڈیفنس بی اور سبزہ زار کے علاقوں میں سے3 گاڑیاں، مزنگ سے رکشہ جبکہ راوی روڈ، مسلم ٹاؤن، گڑھی شاہو، ریس کورس، پرانی انارکلی، کاہنہ، مانگا منڈی اور فیکٹری ایریا کے علاقوں سے 8موٹر سائیکلیں چوری کر لیں۔ کوٹ عبدالمالک کے قریب ڈاکوؤں نے محمد حیات اور اس کی بیوی سے نقدی، زیورات اور موبائل چھین لیا۔ ڈاکوؤں نے موٹر سائیکل سوار اشرف اور اس کی بہن سے نقدی، دو موبائل چھین لئے۔ ڈاکوؤں نے مشروب کمپنی کے ڈیلر کو روک کر لوٹ لیا، ڈاکوئوں نے نقدی اور موبائل چھین لئے۔ چوروں نے مختلف علاقوں سے دس موٹر سائیکلیں چوری کر لیں۔ شیخوپورہ شاہین ولاز میں سعودی عرب گئے۔ رانا محمود احمد کے گھر سے چور ڈیڑھ کروڑ روپے سے زیادہ مالیت کے سعودی ریال، زیورات اور دیگر اشیا لے گیا۔ چور 38000 سعودی ریال 26 تولے زیورات ایک قیمتی کار، ڈیڑھ لاک روپے پاکستانی کیس اور دیگر قیمتی اشیاء لے گئے۔