سرینگر(این این آئی)مقبوضہ کشمیر میںبھارتی فوج کنٹرول لائن پراسرائیلی ساختہ سپائک ٹینک شکن گائیڈڈ میزائل نصب کررہا ہے ۔ کشمیرمیڈیا سروس کے مطابق سرکاری ذرائع نے صحافیوں کو بتایاکہ بھارتی فوج نے اسرائیل سے240 سپائک ٹینک شکن میزائل اور 12لانچرزہنگامی بنیادوں پرحاصل کئے ہیں تاکہ ان کوکنٹرول لائن پر نصب کیا جائے۔ یہ میزائل دشمن کے ٹھکانوں اور بنکروں کو تباہ کرنے کے لیے بھی استعمال کئے جاسکتے ہیں۔ ذرائع کے مطابق سپائک ٹینک شکن میزائلوں کو رات کے دوران بھی استعمال کیا جاسکتا ہے۔ذرائع ابلاغ کی اطلاعات کے مطابق ادھمپور میں بھارتی فوج کی شمالی کمانڈ کے ہیڈکوارٹر نے اسرائیل سے حاصل کئے گئے 240سپائک ٹینک شکن میزائل اور12لانچرز وصول کرلئے ہیں۔