کانپور(آئی این پی)کپل دیو نے کہا ہے کہ راہول ڈریوڈ ایک اچھے انسان اور بہترین کرکٹر رہے ہیں جبکہ وہ بطور کوچ بھی بہتر کام کریں گے۔کپل دیو نے کہا کہ راہول ڈریوڈ نے جس طرح اپنے کرکٹ کے دنوں میں ٹیم کے لیے پرفارم کیا، وہ اس سے بہترین فرائض اب بطور کوچ سرانجام دیں گے۔
انہوں نے کہا کہ کچھ عرصے کے بعد، ہمیں معلوم ہوجائے گا کہ راہول بھارتی ٹیم کے لیے کیا کرنے والے ہیں لہذا ہمیں صرف مثبت سوچ رکھنی چاہیے۔کپل دیو نے یہ بھی کہا کہ میں ان دنوں صرف کرکٹ دیکھنے جاتا ہوں اور کھیل سے لطف اندوز ہوتا ہوں، میں تجزیہ کار کے نقطہ نظر سے نہیں دیکھتا، میرا کام کھیل سے لطف اندوز ہونا ہے۔انہوں نے بھارتی کرکٹر رویندرا جڈیجا کے حوالے سے کہا کہ وہ کتنا شاندار کرکٹر ہے لیکن بدقسمتی سے وہ ایک بلے باز کے طور پر بہتر ہوا ہے، جب انہوں نے  شروعات کی تو وہ کہیں بہتر بولر تھے لیکن اب وہ اس سے کہیں بہتر بلے باز ہے، جب بھارتی ٹیم کو ضرورت ہوتی ہے تو جدیجا لازمی پرفارم کرتا ہے۔