مری (نامہ نگار خصوصی) منگل کے روز وزیراعلیٰ پنجاب مریم نواز شریف مری پہنچ گئیں۔ ایسے میں راستے بند ہونے کے باعث مریم نواز شریف بذریعہ ہیلی کاپٹر اسلام آباد سے گھڑیال ہیلی پیڈ پہنچیں۔ مریم نواز شریف گھڑیال ہیلی پیڈ سے کشمیر پوائنٹ اپنی رہائش گاہ پر پہنچیں جہاں ان کے والد اور سابق وزیراعظم محمد نواز شریف پہلے ہی سے یہیں قیام پذیر ہیں۔  ادھر محمد نواز شریف اور مریم نواز کے مابین پی ٹی آئی کے ڈی چوک میں پہنچنے سے متعلق بعض انتہائی اہم امور پر تبادلہ خیال کیے جانے کی اطلاعات بھی ملی ہیں۔ سابق وزیراعظم محمد نواز شریف کی جانب سے بیلاروس کے صدرکے اعزاز میں آج مری میں ظہرانہ دیا جائے گا۔ وزیر اعلیٰ پنجاب کی آج قائد مسلم لیگ ن محمد نواز شریف کے ہمراہ بیلا روس کے صدر سے ملاقات بھی متوقع ہے۔ اس موقع پر سخت سکیورٹی انتظامات بھی کئے جا رہے ہیں اور روٹس پر پولیس کی بھاری نفری تعینات کی جائے گی۔