آئی ایس پی آر کا کہنا ہے کہ چین کے سینٹرل ملٹری کمیشن کے وائس چیئرمین جنرل ژانگ یو ژیا نے جنرل ہیڈ کوارٹرز کا دورہ کیا ہے۔پاک فوج کے شعبہ تعلقات عامہ ( آئی ایس پی آر ) کے مطابق چین کے سینٹرل ملٹری کمیشن کے وائس چیئرمین کے ساتھ اعلیٰ سطح کا وفد بھی جی ایچ کیو پہنچا۔جی ایچ کیو پہنچنے پر جنرل ژانگ یو شیا نے یادگارِ شہداء پر پھولوں کی چادر چڑھا کر شہداء پاکستان کو خراجِ عقیدت پیش کیا، جنرل یو ژیا کو پاک فوج کے چاق و چوبند دستے کی جانب سے گارڈ آف آنر بھی پیش کیا گیا۔ چین کے سینٹرل ملٹری کمیشن کے وائس چیئرمین نے چیف آف آرمی اسٹاف جنرل سید عاصم منیر سے ملاقات کی جس میں دونوں ممالک کے وفود بھی شریک ہوئے۔آئی ایس پی آر کا کہنا ہے کہ پاک چین عسکری قیادت کی ملاقاتوں میں باہمی دلچسپی کے امور، علاقائی سیکیورٹی کی صورتحال، علاقائی استحکام کے اقدامات اور دفاعی تعاون کو مزید فروغ دینے پر تبادلہ خیال کیا گیا۔چیف آف آرمی اسٹاف جنرل سید عاصم منیر نے پاک چین تعلقات کی پائیداری اور موسموں سے بے نیاز مضبوط شراکت داری پر زور دیتے ہوئے کہا کہ پاک چین شراکت داری باہمی اعتماد اور تعاون کی بنیاد پر قائم ہے۔   آئی ایس پی آر کا کہنا ہے کہ آرمی چیف نے پاک چین تاریخی شراکت داری کے بتدریج مزید مضبوط ہونے کی امید ظاہر کی اور مشکل حالات میں پاکستان کے ساتھ کھڑے رہنے پر چینی قیادت سے اظہار تشکر کیا۔ملاقات میں جنرل ژانگ یو ژیا نے پاکستان کی جانب سے اسٹریٹجک شراکت داری کے عزم کو سراہا، جنرل یو ژیا نے دہشت گردی کے خلاف جنگ میں پاک فوج  کی پیشہ ورانہ مہارت اور عزم کی تعریف کی۔چینی سینٹرل ملٹری کمیشن کے وائس چئیرمین نے دیرینہ تعلقات کو مزید مضبوط کرنے کے عزم کا اعادہ کیا۔