لاہور (آئی اےن پی) پاکستان اور جنوبی افریقہ کے کرکٹ بورڈز نے حالیہ سیریز کے فوری بعد ایک اور مختصر دورانئے کی سیریز کے حوالے سے مذاکرات شروع کر دیئے۔ پی سی بی کے ذرائع کے مطابق بھارتی کرکٹ ٹیم کا دورہ جنوبی افریقہ مختصر ہونے کی وجہ سے پاکستان جنوبی افریقہ کی سیریز کی تجویز سامنے آئی ہے، یہ تجویز گزشتہ روز ہونے والے عبوری انتظامی کمیٹی کے اجلاس میں بھی زیربحث آئی۔ پاکستان کرکٹ بورڈ کے ایک اعلیٰ عہدیدار کا کہنا ہے کہ جنوبی افریقہ کے ساتھ مذاکرات کا آغاز کر دیا ہے، اگر مذاکرات کامیاب ہو جاتے ہیں اور دونوں بورڈز شرائط پر آمادہ ہوتے ہیں تو پاکستان ٹیم امارات میں جاری سیریز کے فوری بعد مختصر دورے کے لئے جنوبی افریقہ جائے گی اور مختصر دورانئے کے میچز کھیلے جائیں گے۔