کراچی (نیوز رپورٹر ) کراچی کے علاقے رنچھوڑ لائن میں مکان کی چھت گرگئی، شیرخوار بچی اور 2خواتین جاں بحق ہوگئیں جبکہ ایک شخص شدید زخمی ہے۔ کراچی کے علاقے رنچھوڑ لائن میں کچھی میمن قبرستان کے قریب مکان کی چھت گر گئی، ملبے میں سے دو خواتین اور ایک بچی کی لاشیں نکال لی گئیں جبکہ ایک شخص شدید زخمی ہے۔پولیس کے مطابق جاں بحق ہونے والوں میں زبیدہ زوجہ ندیم عمر35سال(ماں) ، افشاں دختر ندیم عمر23سال (بیٹی)  اور بچی رباب دختر عبدالقدیر عمر01ماہ شامل ہیں۔ زخمی ہونے والے شخص کی شناخت عبدالقدیر ولد لال خان عمر25سال ہوئی ہے۔ گرنے والا مکان سنگل اسٹوری اور مخدوش حالت میں تھا، مکان میں ایک ہی خاندان رہائش پذیر تھا۔ انہوں نے کہا کہ پولیس نے ایس بی سی اے کو لکھا ہے کہ علاقے میں موجود دیگر مخدوش مکانات کا سروے کیا جائے اور ایسے مکانات خالی کروا کر گرائے جائیں۔ ریسکیو ذرائع کا کہنا ہے کہ تنگ گلیوں کی وجہ سے امدادی کاموں میں مشکلات کا سامنا ہے عمارت کا ملبہ ہٹانے کے لیے کام جاری ہے۔