نواز شریف میرے خلاف الیکشن لڑ کر دکھائیں: یاسمین راشد ‘ن لیگ آپ کو 3مرتبہ دھول چٹا چکی: عظمیٰ بخاری 

لاہور (نیوز رپورٹر+این این آئی) پاکستان تحریک انصاف کی رہنما ڈاکٹر یاسمین راشد نے قائد مسلم لیگ (ن) کو چیلنج کرتے ہوئے کہا ہے کہ اگر نواز شریف اتنے بہادر ہیں تو میرے خلاف الیکشن لڑ کر دکھائےں۔ انسداد دہشت گردی عدالت میں پیشی کے موقع پر تحریک انصاف کی رہنما ڈاکٹر یاسمین راشد اور عمر سرفراز چیمہ نے صحافیوں سے غیر رسمی گفتگو کی۔ ڈاکٹر یاسمین راشد نے کہا کہ لیول پلیئنگ فیلڈ کا مطلب ہے کہ جس نے الیکشن لڑنا ہے وہ باہر ہو، نواز شریف سزا یافتہ اور اشتہاری ہے اس کو آپ باہر سے الیکشن کے لیے لے آئے ہیں۔ سابق صوبائی وزیر نے مزید کہا کہ نواز شریف کو پروٹوکول دیا جا رہا ہے۔ ہمارے کیسز کا چالان بھی تین چار ماہ سے آج تک نہیں آیا، دریں اثناءپاکستان مسلم لیگ ن پنجاب کی ترجمان عظمیٰ بخاری نے یاسمین راشد کے بیان پر اپنے ردعمل میں کہا ہے کہ محترمہ آپ میں ہمت ہے تو سچ قوم کو بتائیں کہ 9مئی کو بغاوت کا پروگرام کیوں بنایا؟۔ ہمت ہے تو یہ بتائیں پاکستان میں فتنہ فساد برپا کرنے، سری لنکا بنانے کی سازش کیوں کی؟۔ ہمت کر کے اپنی آڈیوز جس میں آپ خواتین کے استعمال، عدلیہ کے ساتھ سازباز اور 9مئی کی پلاننگ کا جواب دے دیں۔ میاں محمد نواز شریف اور انکی جماعت آپ کو تین مرتبہ دھول چٹا چکی ہے۔ اس مرتبہ بھی قائد میاں نواز شریف اپنے حلقے سے الیکشن لڑیں گے، آپ اپنی فکر فرمائیں، آپ الیکشن میں ہوں گی یا نہیں، یہ ابھی معلوم نہیں، جیل کی فرسٹریشن آپ کے کھوکھلے بیانات اور قد سے بڑی گفتگو سے صاف نظر آ رہی ہے۔