لاہور (سپورٹس رپورٹر+نمائندہ سپورٹس) بنگلہ دیش نے پاکستان کو سپر فور مرحلہ میں37رنز سے شکست دیکر ایشیا کرکٹ کپ سے باہر کردیا‘فاتح ٹیم فائنل میں پہنچ گئی ۔ فیصلہ کن معرکہ بھارت اور بنگلہ دیش کے درمیان کل کھیلا جائیگا۔ ابو ظہبی میں کھیلے گئے میچ میں بنگلہ دیش نے ٹاس جیت کر بلے باز ی کا فیصلہ کیا اور مشفیق الرحیم کے 99رنز کی بدولت48.5اوورز میں 239رنز بنائے ۔ لٹن داس 6‘ سومعیہ سرکار صفر ‘مومن الحق 5 ‘محمد مٹھن 60‘امر القیس 9‘محمود اللہ 25 ‘مہدی حسن میراز 12‘ کپتان مشرفی مرتضیٰ 13 اور روبیل حسین ایک رن بناکر آئوٹ ہوئے ۔ جنید خان نے 4 ‘شاہین شاہ آفریدی اور حسن علی نے 2، 2 کھلاڑیوں کو آئوٹ کیا ۔ شاداب کے حصے میں ایک وکٹ آئی ۔ پاکستانی بیٹنگ لائن شروع سے لڑا کھڑا گئی اور پھرسنبھل نہ سکی ۔ فخر زمان ایک بار پھر ناکام رہے جس کے بعد ٹیم دبائو کا شکار ہوگئی‘ امام الحق 83رنز بنا کر نمایاں رہے۔ فخر زمان ایک ‘بابر اعظم ایک ‘کپتان سرفراز احمد 10 ‘شعیب ملک 30 ‘شاداب خان 4 ‘محمد آصف 31 ‘محمد نواز 8 ‘حسن علی 8 رنز بنا کر آئوٹ ہوئے۔ شاہین آفریدی 14اور جنید خان 3رنز بناکر ناٹ آئوٹ رہے ۔ پاکستانی ٹیم 9وکٹوں پر 202رنز بناسکی ۔ مستفیض الرحمان نے 4 ‘مہدی حسن میراز نے 2کھلاڑیوں کو آئوٹ کیا ۔مشفیق الرحیم کو میچ کا بہترین کھلاڑی قرارد یاگیا ۔