لاہور (نیٹ نیوز) کراچی سپرہائی وے نوری آباد کے قریب مسافر وین کو حادثے  کے بعد آگ لگ گئی  13 افراد جاں بحق اور 5 زخمی ہوگئے۔ حیدر آباد سے کراچی آنے والی ہائی ایس وین کو حادثہ ٹائی راڈ ٹوٹنے کے باعث پیش آیاجس کے نتیجے میں وین الٹ گئی اور پھر اس میں آگ بھڑک اٹھی۔ موٹروے پولیس کے مطابق حادثہ نوری آباد کے قریب پیش آیا ، وین میں 20 سے 22 مسافر موجود تھے جن میں سے 13 افراد کے جاں بحق ہونے کی اطلاعات ہیں۔ موٹروے پولیس کاکہنا ہے کہ مسافر وین حادثے میں ایک سال کی بچی معجزانہ طور پر بچ گئی ہے جبکہ حادثے میں وین ڈرائیور بھی محفوظ رہا۔ سماجی کارکن سعد ایدھی کا کہنا ہے کہ نوری آباد حادثہ کے مقام پر امدادی آپریشن مکمل کرلیاگیاہے، وین حادثے میں اب تک 13افراد کی نعشیں نکالی گئی، 5 افراد کو زخمی حالت میں نکالاگیا ہے۔ حادثے کا شکار ہونے والی وین کے ڈرائیور نے کہا کہ حادثہ سے قبل آگے جانے والی گاڑی کا بونٹ نکل کر میری گاڑی کی ونڈ سکرین پر لگاہے، جس کے بعد میں گاڑی کو کنڑول نہیں کرسکا۔موٹروے پولیس کو دیے گئے بیان میں ڈرائیور نے بتایا کہ گاڑی بے قابو ہوکر حادثہ کا شکار ہوئی اور پھر اس میں آگ لگ گئی۔