پاکستان فٹبال فیڈریشن ‘ 21اضلاع کے 446کلبز کی فزیکل سکروٹنی مکمل

لاہور(سپورٹس رپورٹر)پی ایف ایف کے انتخابی عمل دوبارہ شروع ہوگیا،موسم اور بعض دیگر ناگزیر وجوہات کی وجہ سے کلبز کی درخواست پر سکروٹنی کا سلسلہ وقتی طور پر روک دیا گیا تھا، صورتحال بہتر ہونے پر اب اس کا دوبارہ آغاز کردیا گیا ہے، تاحال 21اضلاع کے 446کلبز کی فزیکل سکروٹنی مکمل کی گئی ہے،اس دوران 260میچز کروائے گئے۔ سکروٹنی کا عمل ڈسٹرکٹ چیمپئن شپ میچز کے ساتھ منسلک کیا گیا ہے تاکہ حقیقی اور فعال کلبز ہی پی ایف ایف الیکشن کا حصہ بن سکیں۔پاکستان فٹبال کنیکٹ پروگرام کے سربراہ سعود ہاشمی کا کہنا ہے کہ سکروٹنی کا عمل تیزی سے مکمل کیا جارہا ہے، گزشتہ ہفتے 7مقامات پر 70میچز کروائے گئے،ایک ہفتہ میں 100کے قریب میچ شیڈول کئے جارہے ہیں تاکہ فٹبال کنیکٹ کے پروٹوکولز کے تحت کھلاڑیوں اور آفیشلز کی میدان میں موجودگی کی تصدیق کی جاسکے، پی ایف ایف تیزی سے انتخابات کی جانب قدم بڑھارہی ہے۔