میلادالنبی پرضلعی انتظامیہ غیر سنجیدگی کا مظاہرہ کر رہی ہے:طاہر رضا قادری

گوجرانوالہ(نمائندہ خصوصی )ضلعی انتظامیہ عید میلادالنبی کیلئے جلوس کے انتظامات میں غیر سنجیدگی کا مظاہرہ کر رہی ہے۔ ٹوٹے پھوٹے روڑ اور گلیوں میں کھڑا سیوریج کا پانی جوہڑ کا منظر پیش کررہاہے،پیدل چلنے کا راستہ بھی نہیں جو میلاد جلوس کے منتظمین اورشہریوں کے لیے شدید مشکلات اور اذیت کا باعث ہے۔ ان خیالات کا اظہار صوبائی صدر پاکستان سنی تحریک علامہ طاہر رضا قادری ،ضلعی صدر سنی تحریک ڈاکٹر حبیب الرحمن رضوی نے میلاد جلوس کے جائزہ اجلاس سے گفتگو کرتے ہوئے کیا۔ان کا کہنا تھا کہ مختلف روڑ پرجگہ جگہ گندگی اور کوڑے کے ڈھیر لگے ہیں۔کوئی پرسان حال نہیں،درخواست دینے کے باوجودکوئی شنوائی نہیں ہوسکی۔ڈی سی گوجرانوالہ سے اصلاح احوال کا مطالبہ کرتے ہیں۔