راجہ منیب
(@RajaMuneeb91)
RajaMuneeb5@gmail.com
پاکستان ایک عرصے سے اندرونی اور بیرونی دشمنوں کا سامنا کر رہا ہے، جن میں سے ایک خوارج ہیں۔ یہ دہشت گرد عناصر نہ صرف ملک کے امن کو تباہ کرنے کی کوشش کرتے ہیں بلکہ معاشرتی تقسیم کو فروغ دینے کے لیے عوام اور فوج کے درمیان دراڑیں ڈالنے کی سازشوں میں مصروف رہتے ہیں۔ لیکن پاکستان کی تاریخ گواہ ہے کہ خوارج جیسے دشمن اپنے مذموم عزائم میں کبھی کامیاب نہیں ہوئے اور نہ ہی ہوں گے، کیونکہ عوام اور فوج کا اتحاد ناقابل تسخیر ہے۔
خوارج تاریخی طور پر وہ گروہ ہیں جو مذہبی شدت پسندی کے باعث اسلام کے بنیادی اصولوں سے منحرف ہوئے اور خلافت کے خلاف بغاوت کا پرچم بلند کیا۔ آج بھی ان کے نظریات کو اپنائے ہوئے مختلف شدت پسند گروہ پاکستان میں انتشار اور فتنہ پھیلانے کی کوشش کرتے ہیں۔ یہ گروہ خود کو اسلام کا علمبردار قرار دیتے ہیں، لیکن درحقیقت یہ اسلام کی غلط تشریح کرتے ہوئے معصوم لوگوں کا خون بہاتے ہیں۔
خوارج کی دہشت گردانہ کارروائیاں خصوصاً قبائلی علاقوں اور خیبرپختونخوا میں زیادہ دیکھی گئی ہیں۔ حالیہ دنوں میں شمالی وزیرستان کے میر علی میں خوارج نے بھتہ نہ ملنے پر گائے منڈی پر حملہ کیا، جسے پاک فوج نے بروقت کارروائی کرتے ہوئے ناکام بنا دیا۔ دہشت گردوں کو منطقی انجام تک پہنچا کر علاقے میں امن بحال کر دیا گیا۔ پاک فوج نے نہ صرف اس کارروائی کو ناکام بنایا بلکہ دہشتگردوں کے مضبوط ٹھکانوں کو تباہ کیا اور علاقے میں امن کی فضا کو قائم رکھا۔
خوارج کی ہمیشہ سے یہ کوشش رہی ہے کہ عوام اور پاک فوج کے درمیان اختلافات پیدا کریں۔ وہ جانتے ہیں کہ اگر عوام اور فوج ایک ساتھ کھڑے رہے تو وہ کبھی کامیاب نہیں ہو سکیں گے۔ اس لیے یہ عناصر دہشت گردانہ حملے کرکے عوام کو خوفزدہ کرتے ہیں اور پھر یہ تاثر دینے کی کوشش کرتے ہیں کہ ریاست ان کی حفاظت کرنے میں ناکام ہو گئی ہے۔
پی ٹی ایم جیسے گروہ، جو بظاہر امن کے داعی ہیں، اکثر خوارج کے ناپاک ایجنڈے کو آگے بڑھانے میں ملوث پائے جاتے ہیں۔ یہ لوگ چیک پوسٹوں کو ختم کرنے اور فوجی آپریشنز کو روکنے کا مطالبہ کرتے ہیں، تاکہ دہشت گردوں کو دوبارہ منظم ہونے کا موقع مل سکے۔ درحقیقت، یہ عناصر خوارج کے سہولتکار کے طور پر کام کرتے ہیں اور عوام کو ریاست کے خلاف بھڑکاتے ہیں۔
قبائلی عوام ہمیشہ سے اپنی فوج کے ساتھ شانہ بشانہ کھڑے رہے ہیں۔ تاریخ گواہ ہے کہ جب بھی ملک کو اندرونی یا بیرونی خطرات کا سامنا ہوا، قبائلی عوام نے اپنی افواج کے ساتھ مل کر دشمنوں کا ڈٹ کر مقابلہ کیا۔ آج بھی یہی صورتحال ہے۔ خوارج کی تمام سازشوں کے باوجود قبائلی عوام جانتے ہیں کہ پاک فوج ہی ان کی حقیقی محافظ ہے۔
شمالی وزیرستان، جنوبی وزیرستان اور دیگر قبائلی علاقوں میں عوام نے پاک فوج کے ساتھ مل کر دہشت گردوں کے خلاف نہ صرف لڑائی میں حصہ لیا بلکہ ان کی مخبری کرکے خوارج کو ان کے بلوں سے نکالنے میں اہم کردار ادا کیا۔
پاکستان کی مسلح افواج نے ہمیشہ دہشت گردوں کو ان کے منطقی انجام تک پہنچایا ہے۔ شمالی وزیرستان میں ہونے والے حالیہ آپریشنز اس بات کا منہ بولتا ثبوت ہیں کہ دہشت گردوں کو کہیں بھی پناہ نہیں ملے گی۔ چاہے وہ نور ولی محسود ہو یا کوئی اور خارجی، پاک فوج ہر دہشت گرد کو اس کے انجام تک پہنچانے کا عزم رکھتی ہے۔
نور ولی محسود جیسے دہشت گردوں کو یہ سمجھنا ہوگا کہ پاکستان کی طرف میلی نظر اٹھانے سے پہلے انہیں یہ یاد رکھنا چاہئے کہ اس وطن کے بہادر سپوت ہمہ وقت چوکس ہیں۔ عوام کے تعاون سے دہشت گردی کا ہر سانپ اپنا سر کھو چکا ہے اور بہت جلد باقی بچے ہوئے عناصر بھی انجام کو پہنچیں گے۔
پاکستان کی ریاست اور افواج نے ہمیشہ یہ واضح پیغام دیا ہے کہ جو لوگ ہتھیار ڈال دیں اور راہِ راست پر آجائیں، ان کے لیے معافی اور اصلاح کا موقع موجود ہے۔ لیکن جو لوگ دہشت گردی کا راستہ اپناتے رہیں گے، ان کے لیے کوئی جگہ نہیں۔ ہر سانپ کا سر کچلا جائے گا، اور خوارج کے باقی بچے عناصر بھی جلد انجام کو پہنچیں گے۔
پی ٹی ایم جو کہ بظاہر خیبرپختونخوا کے نوجوانوں کی ہمدرد بننے کی دعویدار ہے، دراصل خوارج کے ایجنڈے کو فروغ دے رہی ہے۔ یہ جماعت عوام کو دھوکہ دینے کے لیے امن کے جھوٹے نعرے لگاتی ہے، لیکن حقیقت میں یہ دہشت گردوں کی حمایت میں پیش پیش ہے۔ خوارج جب معصوم عوام کو شہید کرتے ہیں تو پی ٹی ایم کے رہنما ان کی لاشوں پر سیاست کرنے پہنچ جاتے ہیں۔
منظور پشتین اور محسن داوڑ جیسے لوگ، جو پاکستان کے آئین اور قانون کو نہیں مانتے، خیبرپختونخوا کے نوجوانوں کو ریاست کے خلاف اکسانے میں لگے ہیں۔ لیکن نوجوان ان عناصر کو پہچان چکے ہیں اور جانتے ہیں کہ پاکستان کی اصل ترقی اور خوشحالی ریاست اور پاک فوج کے ساتھ کھڑے رہنے میں ہی ہے۔
پاکستان کا مستقبل روشن ہے کیونکہ اس ملک کے عوام اور افواج کے درمیان ایک لازوال رشتہ قائم ہے۔ حکومت اور پاک فوج نے ہمیشہ خیبرپختونخوا اور قبائلی علاقوں کی ترقی کے لیے عملی اقدامات کیے ہیں۔ معیاری تعلیمی ادارے، روزگار کے مواقع، صحت کے مراکز اور انفراسٹرکچر کی ترقی کے منصوبے اس بات کا ثبوت ہیں کہ ریاست صرف اور صرف عوام کی فلاح و بہبود کے لیے کام کر رہی ہے۔
دہشت گردی کے خلاف جنگ میں پاک فوج اور عوام کا اتحاد ہمیشہ سے مضبوط رہا ہے، اور یہ اتحاد ہی وہ قوت ہے جو خوارج جیسے دشمنوں کو کبھی کامیاب نہیں ہونے دے گا۔
خوارج، چاہے کتنی ہی سازشیں کیوں نہ کر لیں، پاک فوج اور عوام کے اتحاد کو نہیں توڑ سکتے۔ پاکستانی عوام جانتے ہیں کہ ان کی حفاظت اور ترقی کا واحد ذریعہ پاک فوج کے ساتھ کھڑے رہنا ہے۔ دہشت گردوں کا انجام ہمیشہ موت اور شکست ہے، اور اس جنگ میں پاکستان کی فتح یقینی ہے۔