پاکستان یوتھ ہاکی ٹیم یوتھ اولمپکس ٹورنامنٹ کے لیے کوالیفائی نہ کر سکی

لاہور (سپورٹس رپورٹر+نمائندہ سپورٹس) پاکستان یوتھ ہاکی ٹیم یوتھ اولمپکس ٹورنامنٹ کے لیے کوالیفائی نہ کر سکی۔ پاکستان ٹیم اپنے پول میں تیسری پوزیشن پر رہنے کی بنا پر ایشین یوتھ اولمپک کوالیفائر کے سیمی فائنل تک رسائی حاصل نہ کر سکی۔ تھائی لینڈ بنکاک میں پاکستان ٹیم کو پہلے ملائیشیا کے ہاتھوں بارہ ایک سے شکست کا سامنا کرنا پڑا جبکہ بنگلہ دیش کےخلاف میچ میں تین ایک سے برتری حاصل کرنے کے باوجود آخری تین منٹ میں بنگلہ دیش کے ہاتھوں دو گولز نے پاکستان ٹیم کو سیمی فائنل کی دوڑ سے باہر کر دیا۔ پاکستان اور بنگلہ دیش کے درمیان میچ تین تین گول سے برابر رہا۔ واضح رہے کہ دوسرے گروپ سے بھارت اور جنوبی کوریا جبکہ پاکستان ٹیم کے پول سے ملائیشیا اور بنگلہ دیش نے سیمی فائنل کے لیے کوالیفائی کر لیا۔