ٹورنامنٹ میں بہترین کارکردگی کو اپنا ہدف بنایا ہوا ہے محمد عامر

لاہور (نمائندہ سپورٹس +سپورٹس رپورٹر ) قومی فاسٹ باﺅلر محمد عامرنے کہا ہے کہ وہ پہلی مرتبہ عالمی کپ کرکٹ ٹورنامنٹ میں شرکت کیلئے پرجوش ہیں ، میگا ایونٹ کھیلنا ہر کھلاڑی کا خواب ہوتا ہے اور انہوں نے بھی ٹورنامنٹ میں بہترین کارکردگی کو اپنا ہدف بنایا ہوا ہے۔ کئی کھلاڑی سالوں تک اس ٹورنامنٹ کا انتظار کرتے ہوئے سخت محنت کرتے ہیں اور پھر اچانک انہیں ایونٹ سے قبل انجری کے سبب محرومی کا سامنا رہتا ہے تاہم پاکستانی ٹیم میں روٹیشن پالیسی کے سبب انہیں اس ٹورنامنٹ کی بہترین تیاری کا موقع مل جائے گا۔ ورلڈ کپ بہت بڑا اور اہم ٹورنامنٹ ہے ، ان کی پہلی خواہش تو یہ ہوگی کہ پاکستانی ٹیم ایک مرتبہ پھر یہ ٹائٹل اپنے نام کرے اور اسکے بعد وہ ٹورنامنٹ میں بہترین بالر کا اعزاز حاصل کرنا چاہیں گے۔