کوٹ اسلام، خانیوال، میاں چنوں، دنیا پور (نامہ نگار، خبر نگار، نمائندہ نوائے وقت) ٹریفک حادثات میں ایک خاندان کے 4 افراد سمیت 8 جاں بحق، کوٹ اسلام سے نامہ نگار کے مطابق کوٹ اسلام کے نواحی اڈہ جھلار مدینہ کے رہائشی صابر عمر19سال ،عنصر 13 سال، جمشید 18 سال،مزمل 11سال گزشتہ رات آٹھ بجے کے قریب موٹرسائیکل پر عبدالحکیم جا رہے تھے کہ دھرم پل کے نزدیک مخالف سمت سے آنے والی ٹریکٹر ٹرالی سے ٹکرا گئی جس کے نتیجہ میں چاروں موٹرسائیکل سوار موقع پر جاں بحق ہوگئے ٹریکٹر ٹرالی ڈرائیور موقع سے فرار ہوگیا جاں بحق ہونے والوں کا تعلق ایک ہی خاندان سے ہے پولیس نے ضروری کارروائی کے بعدنعشیں ورثاء کے حوالے کردیں نعشیں گھر پہنچنے پر کہرام مچ گیا ورثاء دھاڑیں مار مارکر روتے رہے۔ نواحی علاقہ پچیس پل کا رہائشی منشی اللہ بخش جس کو چندروز قبل 12گھگھ کے قریب ڈالے نے ٹکرمارکرشدیدزخمی کردیا وہ نشتر ہسپتال میں گزشتہ روز زندگی کی بازی ہارگیا مرحوم کی نمازجنازہ ادا کردی گئی جس میں اہل علاقہ کی کثیرتعداد نے شرکت کی۔ دنیا پور سے نامہ نگار کے مطابق تیز رفتار بس کے نیچے آ کر سڑک پار کرنے والا 22 سالہ نوجوان کچلا گیا۔موقع پر ہی جاں بحق۔دوسرے واقعہ میں بچوں نے کھیلتے ہوئے گھر میں کھڑی کار چلادی ضعیف العمر دادی نیچے آکر جاں بحق۔پل محمود کا رہائشی 22 سالہ نوجوان حماد ولد حنیف خواجہ گزشتہ روز اڈہ پل محمود کے مقام پر سڑک کراس کر رہا تھا کہ اس دوران فیصل آباد سے صادق آباد جانے والی ایک تیز رفتار مسافر بس نمبر6940۔ایل آر جے نے اسے کچل دیا جس سے وہ موقع پر ہی جاں بحق ہو گیا۔ ادھر نواحی چکنمبر243 ڈبلیو بی میں ایک گھر میں کھڑی کار کو بچوں نے کھیلتے ہوئے اسٹارٹ کر لی اور اسے کنٹرول نہ کر سکے جس کی زد میں آکر کار کے سامنے بیٹھی ہوئی ان کی دادی نذیراں مائی زوجہ محمد شریف ہلاک ہو گئی۔ وجھیانوالہ، میاں چنوں، محسن وال سے نامہ نگار کے مطابق نواحی علاقہ 76 پندرہ ایل میاں چنوں کا رہائشی نذر حسین کھیتوں میں کام کر رہا تھا کہ اچانک ٹریکٹر سے گر گیا اور موقع پر ہی دم توڑ گیا۔ شاہ جمال سے نامہ نگار کے مطابق نواحی علاقہ اتراء سندیلہ کے چوک گد پور کے مقام پر موٹر سائیکل ریڑھا انتہائی تیز رفتاری سے سائیڈ روڈ سے جو نہی جتوئی روڈ پر اچانک آ یا جنوب سے موٹر سائیکل پر سوار سناواں کے رہائشی امتیاز احمد ولد اقبال اپنی بیوی دو بیٹیوں کے ساتھ شاہ جمال کی جانب آ رہے تھے ٹکرا گئے جس سے اس کی تین سالہ بیٹی فریال موقع پر جاں بحق ہو گئی جبکہ ایک سالہ نمل امتیاز اور اسکی بیوی شدید زخمی ہو گئے جنہیں رورل ہیلتھ سنٹر شاہ جمال لایا گیا ہسپتال ذرائع کے مطابق پولیس کو قانونی کاروائی کے لئے بر وقت اطلا ع کے باوجود ایک گھنٹہ تک ہسپتال کے ایمر جنسی نہ پہنچی تھی زخمیوں کی نازک صورتحال کے باعث نشتر ریفر کر دیا گیا۔ میاں چنوں سے نامہ نگار کے مطابق نیشنل ہائی وے تلمبہ چوک پر موٹر سائیکل کو بچاتے ہوئے ،تبلیغی جماعت کی گاڑی اُلٹ گئی،دس سے افراد زخمی،ریسکیو نے طبی امداد کے بعد زخمیوں کو ٹی ایچ کیوہسپتال منتقل کردیا۔