غزہ (نوائے وقت رپورٹ+ اے ایف پی) غزہ پٹی میں اسرائیلی فورسز کی فائرنگ سے چار فلسطینی شہید ہو گئے۔ عرب ٹی وی کے مطابق اسرائیلی فورسز کی فائرنگ، آنسو گیس شیلنگ سے 350 فلسطینی زخمی ہو گئے۔ زخمیوں میں صحافی اور طبی عملہ بھی شامل ہے۔ متعدد زخمیوں کی حالت تشویشناک ہے ہزاروں فلسطینی اسرائیلی سرحدی باڑ کے قریب احتجاج کر رہے تھے۔ غزہ کی پٹی میں فلسطینی مہاجرین کا گھر واپسی مارچ پانچویں ہفتے میں داخل ہو گیا تیس مارچ سے اب تک 44 فلسطینی شہید اور ہزاروں زخمی ہو گئے ہیں غزہ کی پٹی میں ایک بار پھر ہزاروں فلسطینی اسرائیلی سرحد پر پہنچ گئے اسرائیلی فورسز نے مظاہرین پر آنسو گیس کے شیلز برسائے اور متعدد افراد کو براہ است گولیاں ماریں ۔ صہیونی افواج نے طبی امداد فراہم کرنے والے اہلکاروں اور صحافیوں کو بھی نہیں بخشا خلیجی اخبار کی رپورٹ کے مطابق تیس مارچ سے جاری احتجاج میں اب تک 39 فلسطینی شہید ہو چکے ہیں اس دوران 5511 افراد زخمی ہوئے 1499 زخمیوں کو براہ راست گولیاں لگیں جبکہ 107 افراد ربڑ کی گولیوں کا نشانہ بنے اور 408 افراد آنسو گیس کے شیلز لگنے سے زخمی ہوئے دوسری جانب اقوام متحدہ کے ادارہ برائے انسانی حقوق کے سربراہ نے اسرائیل سے مطالبہ کیا ہے کہ وہ غزہ کی پٹی میں طاقت کے استعمال کو بند کرے۔