شاہین کی عمدہ بائولنگ ‘پاکستان نے نیوزی لینڈکو پانچواں ٹی ٹونٹی ہرا دیا‘ سیریز برابر

لاہور(سپورٹس رپورٹر)پاکستان نے آخری ٹی ٹونٹی میچ میں نیوزی لینڈ کو شکست دے کر سیریز 2-2 سے برابر کردی۔ پاکستان کے 179 رنز کے ہدف کے تعاقب میں نیوزی لینڈ کی ٹیم 169 رنز بنا کر آل آؤٹ ہوگئی۔ ٹم سیفرٹ 52 رنز کیساتھ ٹاپ سکورر رہے جبکہ کپتان مائیکل بریسویل نے 23، جمی نیشم نے 16 اور مارک چیپمین نے 12 رنز بنائے۔ شاہین شاہ آفریدی نے 4 کھلاڑیوں کو پویلین روانہ کیا جبکہ اسامہ میر نے 2 وکٹیں حاصل کیں۔ شاداب خان اور عماد وسیم کی ایک ایک کھلاڑی کو آؤٹ کیا۔قذافی سٹیڈیم لاہور میں کھیلے گئے اس میچ میں کیوی ٹیم نے ٹاس جیت کر پاکستان ٹیم کو پہلے بیٹنگ کی دعوت دی۔ قومی ٹیم نے 5 وکٹوں پر 178 رنز بنائے۔ کپتان بابر اعظم نے  کیریئر کی 34ویں نصف سنچری مکمل کی اور 44 گیندوں پر 69 رنز کی اننگز کھیلی۔ فخر زمان نے 43 اور عثمان خان نے 31 رنز بنائے جبکہ اختتامی لمحات میں شاداب خان نے 15 رنز کی اننگز کھیلی۔ زیک فولکس، ولیم او رورکے، بین سیئرز، جمی نیشم اور اور ایش سوڈھی نے ایک ایک وکٹ لی۔شاہین آفریدی کو میچ اور سیریز کا بہترین کھلاڑی قرار دیا گیا ۔