’’ڈسکوور پاکستان‘‘ سیرینا ہوٹلز مقابلہ فوٹو گرافی سکردو کے امتیاز حسین نے جیت لیا

اسلام آباد (کلچرل رپورٹر) سیرینا ہوٹلز کے زیراہتمام ’’ڈسکوور پاکستان‘‘ مقابلہ فوٹو گرافی سکردو کے شرقیہ فوٹو گرافر امتیاز حسین نے جیت لیا۔ مقابلے میں ملک بھر سے شوقیہ فوٹو گرافرز نے اڑھائی سو سے زائد عکسی تصاویر ارسال کی تھیں۔یہ تمام تصاویر پاکستان کے خوبصورت سیاحتی مقامات کی خوبصورتی کو اجاگر کرتی تھیں۔ان تصاویر کی نامور فوٹو گرافر وجاہت ملک اور سید مہدی بخاری و دیگر منصفین پر مشتمل جیوری نے خوب جانچ پڑتال کی۔ جس کے بعد سکردو کے فوٹو گرافر امتیاز حسین کی کھینچی ہوئی تصویر کو اول انعام کا حقدار قرار دیا گیا۔ اس تصویر میں امتیاز حسین نے سکردو شہر کی رات کی لائٹس اور اس کے پس منظر میں آسمان پر چمکتے ستاروں کو کیمرے کی آنکھ میں محفوظ کیا تھا۔ جیوری کے رکن وجاہت ملک کا کہنا تھا کہ سیرینا ہوٹل نے پاکستان کے خوبصورت مقامات کی خوبصورتی کو اجاگر کرنے اور دنیا تک پہنچانے کے لئے ایک اہم اقدام اٹھایا ہے۔ ان تصاویر کی تمام بڑے شہروں کے ساتھ ساتھ دیگر ممالک میں بھی نمائش کا اہتمام ہونا چاہئے۔فاتح فوٹو گرافر کو سیرینا ہوٹل میں دو راتوں کے قیام کے علاوہ ان کی تصاویر کو سیرینا ہوٹل کی کافی بک میں شائع کیا جائے گا۔