30 اگست کو یوم یکجہتی کشمیر،7 ستمبرکویوم ختم نبوت منایا جائیگا:صاحبزادہ حامد رضا

لاہور(خصوصی نامہ نگار )سنی اتحاد کونسل پاکستان کے چیئرمین صاحبزادہ حامد رضا نے کہا ہے کہ 30 اگست کو یوم یکجہتی کشمیر، 7 ستمبر کو یوم ختم نبوت منایا جائے گا۔ 6 ستمبر کو یوم دفاع کے موقع پر پاک فوج زندہ باد ریلیاں نکالی جائیں گی اور فوجی شہداء کے مزارات پر پھولوں کی چادریں چڑھائی جائیں گی۔ یکم تا دس محرم‘‘ عشرہ فروغ پیغام حسین‘‘ منایا جائے گا۔ حکومت محرم کے دوران قیام امن کے لئے خصوصی اقدامات کرے۔ سنی اتحاد کونسل محرم کے دوران بین المسالک ہم آہنگی کے لئے اپنا کردار ادا کرے گی۔ جمعہ 30 اگست کو ملک بھر کی لاکھوں مساجد میں کشمیر کی سنگین صورت حال پر خطبات جمعہ دیئے جائیں گے اور جمعہ کے اجتماعات میں بھارت کی ریاستی دہشت گردی کے خلاف مذمتی قراردادیں منظور کی جائیں گی۔