شیخوپورہ ‘فیروزوالہ (نمائندہ خصوصی‘نامہ نگار) بلوچستان میں دہشتگردوں کے ہاتھوں جاں بحق ہونے والوں کی میتیں ان کے آبائی علاقوں میں پہنچ گئیں ۔ تین نعشیں شیخوپورہ پہنچنے پر ان کے لواحقین ٹرک ڈرائیوروں اور شہریوں نے نعشیں سڑک پر رکھ کر لاہور روڈ ہائو سنگ کالونی بائی پا س کوبلاک کر دیا۔ جس سے شیخوپورہ لاہور سرگودھا اور فیصل آباد روڈ کی ٹریفک بلا ک ہوگئی ۔ مظاہرین میں مردوں کیساتھ ساتھ خواتین اور گڈز ٹرانسپورٹ کے نمائندوں ‘ ڈرائیوروں کی بڑی تعداد شامل تھی مرنے والے تین افراد کا تعلق شیخوپورہ سے ہے ‘کئی گھنٹوں بعد پولیس کے اعلیٰ حکام نے مظاہرین کے ساتھ مذاکرات کرکے ٹریفک کو بحال کرایا ۔