یاسر شاہ کا ڈوپ ٹیسٹ مثبت آنا ٹیم کیلئے بڑا دھچکا ہے :ہارون رشید

لاہور(سپورٹس ڈیسک )چیف سلیکٹر ہارون رشید نے انٹرنیشنل کرکٹ کونسل کی جانب سے لیگ سپنر یاسر شاہ کی معطلی کے بعد پے در پے پاکستان کرکٹ کو لاحق ہونے والے تنازعات پر مایوسی کا اظہار کیا ہے۔آئی سی سی کے مطابق یاسر شاہ کا ڈوپ ٹیسٹ 13 نومبرکو ہوا تھا جس میں یہ بات سامنے آئی ہے کہ انہوں نے کورثیلیڈون نامی ایک دوا کا استعمال کیا جو کہ واڈا قوانین کے تحت ممنوع ہے۔ہارون رشید نے کہا کہ دورہ نیوزی لینڈ سے قبل یاسر کی معطلی ٹیم کے لیے بڑا دھچکہ ہے۔ انہوں نے غیر ملکی میڈیا سے گفتگو کرتے ہوئے کہا کہ پاکستان کرکٹ کو آئے روز نئے قسم کے تنازعات کا سامنا ہوتا ہے۔ لیگ سپنر کی معطلی کے بعد اب ہمیں آنے والے تمام ایونٹس کے لیے نئے منصوبے ترتیب دینے ہوں گے۔خیال رہے کہ یاسر کی معطلی کا معاملہ ون ڈے کپتان اظہر علی اور محمد حفیظ کی جانب سے ٹریننگ کیمپ کے بائیکاٹ کے محض چند روز بعد ہی سامنے آیا ہے۔تاہم چیئرمین پی سی بی شہریار خان کے مطابق مذکورہ مسئلے کو گزشتہ روز حل کرلیا گیا جبکہ دونوں کھلاڑیوں نے کیمپ میں شمولیت اختیار کرنے پر حامی بھرلی ہے۔پاکستان کا دورہ نیوزی لینڈ 15 جنوری سے آکلینڈ میں کھیلے جانے والے ٹی ٹونٹی سے ہوگا۔