لاہور (سپورٹس رپورٹر +نمائندہ سپورٹس ) جناح پولو اینڈ کنٹری کلب کے زیراہتمام اایکوافینا انٹر کلب پولو چیمپئن شپ کافائنل حبیب میٹرو لائنز نے جیت لیا۔ فائنل میں دلچسپ مقابلے کے بعد ڈائمنڈ پینٹس کی ٹیم کو 10-1 سے شکست کا سامنا کرنا پڑا۔ تفصیلات کے مطابق  مہمان خصوصی سابق کور کمانڈر لاہور لیفیٹننٹ جنرل (ر) صادق علی، جناح پولو اینڈ کنٹری کلب کے سرپرست میجر جنرل محمدرضا ایزد جی او سی 11 ڈیو، صدر کلب لیفٹیننٹ کرنل (ر) شعیب آفتاب، سیکرٹری میجر (ر) بابر محبوب اعوان، فاطمہ گروپ کے سی ای او فواد مختار، ڈائریکٹر علی مختاراور تماشائیوں کی بڑی تعداد موجود تھی۔ فائنل میچ کافی دلچسپ رہا کیونکہ سخت بارش اور سرد موسم بھی میچ نہ روک سکی اور زبردست پولو میچ کھیلا گیا۔ حبیب میٹرو لائنز کی ٹیم نے پہلے چکر سے ہی شاندار کھیل پیش کیا اور بالاخر میچ جیت لیا۔ حبیب میٹرو لائنز کی طرف سے مارکوس پنیلو اور میاں عباس مختار نے شاندار کھیل پیش کیا۔ مارکوس پنیلو اور میاں عباس مختار نے چار چار گول سکور کیے جبکہ شیخ محمد فرہاد اور شیخ محمد رافع نے ایک ایک گول سکور کیا۔ ڈائمنڈ پینٹس کی طرف سے واحد گول ثاقب خان خاکوانی نے سکور کیا۔