محمد حریرہ کو غصہ اور نامناسب رویہ اپنانا مہنگا پڑگیا

لاہور(سپورٹس رپورٹر)فرسٹ کلاس کرکٹ میں ٹرپل سنچری بنانیوالے دوسرے کم ترین پاکستانی بیٹسمین محمد حریرہ کو غصہ اور نامناسب رویہ اپنانے کا خمیازہ بھگتنا پڑ گیا اور پی سی بی کے ضابطہ اخلاق کی خلاف ورزی پر جرمانہ عائد ہوگیا۔خیبرپی کے کیخلاف نیشنل سٹیڈیم کراچی میں جاری قائد اعظم ٹرافی کے ڈے اینڈ نائٹ فائنل میں کھیل کے دوسرے روز ناردرن کے محمد حریرہ پی سی بی کوڈ آف کنڈکٹ کی شق  2.8 کی خلاف ورزی کے مرتکب پائے گئے۔ یہ آرٹیکل میچ میں آؤٹ ہونے پر اپنے ایکشن کے ذریعے غصہ اور غیر مناسب رویے کا اظہار کرنے سے متعلق ہے۔پہلی اننگز کے 22ویں  اوورمیں جب امپائر نے محمد حریرہ کو ایل بی ڈبلیو آؤٹ قرار دیا تاہم نوجوان بیٹسمین نے تاخیرسے کریز چھوڑی، محمد حریرہ نے اپنی غلطی کو تسلیم کیا اور میچ ریفری ندیم ارشد کی طرف سے تجویز کردہ سزا کو قبول کیا، جرمانہ آن فیلڈ امپائرز آصف یعقوب اور فیصل خان آفریدی نے عائد کیا۔واضح رہے کہ اننگز میں 51 رنز بنا کر20 سالہ محمد حریرہ ٹرافی میں مجموعی طور پر 929  رنزکے ساتھ بیٹنگ میں سرفہرست ہوگئے۔