لاڑکانہ (بیورو رپورٹ) پاکستان پیپلز پارٹی بلوچستان کے صوبائی صدر سابق وفاقی وزیر سائنس اینڈ ٹیکنالوجی میر چنگیز خان جمالی نے شہید بے نظیر بھٹوکی15ویں برسی پر انہیں زبردست خراج عقیدت پیش کرتے ہوئے کہا کہ دخترمشرق بے نظیر بھٹو نے ہمیشہ عوام کے حقوق کی جنگ لڑی عوام کی جنگ لڑتے لڑتے شہادت کو گلے لگا کر جمہوریت اور جمہوری اداروں کو دوام بخشا۔ ان خیالات کا اظہار چنگیز خان جمالی نے شہید بے نظیر بھٹو کی برسی کے موقع پر خصوصی گفتگو کرتے ہوئے کیا۔ انہوں نے کہاکہ جیالے اپنی شہید قائد بے نظیر بھٹو کے عظیم مشن کو بلاول بھٹو کی قیادت میں پوراکرینگے شہید بے نظیر نے ملک کے استحکام کے لئے خود کو قربان کردیا ان کی یہ قربانی کبھی بھلائی نہیں جاسکے گی۔ انہوں نے مزید کہاکہ شہید بے نظیر بھٹو نے ہمیشہ جمہوریت،آئین اور قانون پارلیمنٹ کی بالادستی اور انسانی حقوق کی جنگ لڑی۔انہوں نے کہاکہ شہید بے نظیر جیسی لیڈر صدیوں میں پیدا ہوتی ہیں۔سابق وزیر اعظم بے نظیر بھٹو کی شہادت پہ جو خلا پیدا ہو ا وہ کبھی پر نہیں ہوسکتا۔شہید بے نظیر بھٹو بہادر باپ کی بہادر بیٹی تھیں جس نے ہمیشہ غریب عوام کی جنگ لڑی اور جنگ لڑتے لڑتے کوئی سودے بازی نہیں کی جمہوریت کی فروغ کیلئے ان کے بے بہا قربانیاں ہیں جنہیں فراموش نہیں کیاجاسکتا۔