کراچی کےعلاقے رضویہ میں نامعلوم ٹارگٹ کلر کی فائرنگ سے قاری عبدالحفیظ جاں بحق ہوگیا۔ گلشن معمارمیں نامعلوم افراد کی فائرنگ سے پولیس کانسٹیبل ہادی بخش جاں بحق ہوگیا، مقتول اہلکارتھانہ معمارمیں تعینات تھا، جبکہ منگھوپیر کے علاقے سلطان آباد میں نامعلوم افراد کی فائرنگ سے شکیل نامی شخص ہلاک ہوگیا، ادھرملیربکرا پیڑی میں فائرنگ سے عرفان نامی شخص جاں بحق ہوا،گلشن معمارفقیرا گوٹھ میں کلینک پر فائرنگ کر کے اخترگبول نامی شخص کوموت کے گھاٹ اتاردیا گیا، پولیس کے مطابق مقتول کا تعلق ایک سیاسی جماعت سے تھا، فیڈرل بی ایریا کے علاقے واٹر پمپ کے قریب بھی نامعلوم ملزمان نے ایک شخص کوگولیوں کا نشانہ بنایا،جس کی شناخت دانش عباس کے نام سے کی گئی، اس کے علاوہ گزشتہ روزلیاقت آباد سی ایریا میں فائرنگ سے زخمی ہونے والا شاکربھی دوران علاج دم توڑگیا۔ دوسری جانب رینجرزنے اورنگی ٹاؤن اوربخاری کالونی میں جرائم پیشہ افراد کے خلاف ٹارگٹڈ آپریشن کرتے ہوئے تیس سے زائد مشتبہ افراد کوحراست میں لے کراسلحہ برآمد کرلیا جبکہ گزشتہ روزنیوی افسر لیفٹیننٹ کمانڈرعظیم احمد قادری پرہونےوالےقاتلانہ حملے کا مقدمہ تھانہ جیکسن میں درج کرلیا گیاہے۔