الیکشن کمشن کی عدم دلچسپی، ملک میں ایک کروڑ سے زائد اہل خواتین ووٹ ڈالنے سے محروم

اسلام آباد ( اے این این ) الیکشن کمشن کی مسلسل عدم دلچسپی کے باعث ملک بھر میں ایک کروڑ سے زائد اہل خواتین ووٹ ڈالنے سے محروم ٗ مرد اور خواتین ووٹرز کا فرق روز بروز بڑھنے لگا ٗ وفاقی دارالحکومت میں 52 ہزار خواتین کا ووٹرز لسٹوں میں اندراج نہیں ۔ ایک رپورٹ کے مطابق پاکستان کی کل آبادی کا 51 فیصد خواتین اور 49 فیصد مردوں پر مشتمل ہے لیکن قومی ووٹرز لسٹیں اس کا الٹ نقشہ پیش کررہی ہیں۔ دستاویز کے مطابق ایک کروڑ 21 لاکھ سے زائد اہل خواتین ووٹ ڈالنے سے محروم ہیں۔ دستاویز کے مطابق پنجاب میں سب سے زیادہ 67 لاکھ اور سندھ میں 22 لاکھ خواتین ووٹرز لسٹوں میں شامل نہیں جب کہ خیبر پختونخوا میں 20 لاکھ، بلوچستان میں 5 لاکھ 69 ہزار، فاٹا میں 5 لاکھ 23 ہزار اور اسلام آباد میں 52 ہزار خواتین کا ووٹرز لسٹوں میں اندراج نہیں ہیں۔ذرائع کا کہنا ہے کہ الیکشن کمشن کی مسلسل عدم دلچسپی کے باعث مرد اور خواتین ووٹرز کا فرق روز بروز بڑھتا جارہا ہے، خواتین کو انتخابی عمل میں زیادہ سے زیادہ شامل کرنے کے لیے الیکشن کمشن نے شعبہ جینڈر بھی بنایا تھا لیکن 2 سال کے دوران اس شعبے کی کارکردگی واجبی سی رہی۔