لاہور ( این این آئی) لاہور ہائیکورٹ نے پنجاب میں الیکشن کی تاریخ کے سنگل بینچ کے فیصلے کی تشریح کے لئے گورنر اور الیکشن کمیشن کی اپیلوں پر سماعت غیر معینہ مدت تک کے لیے ملتوی کر دی۔لاہور ہائیکورٹ کے جسٹس چوہدری اقبال اور جسٹس مزمل اختر شبیر نے درخواست پر سماعت کی۔عدالت نے کہا کہ معاملہ سپریم کورٹ میں زیرالتوا ہے ،عدالت عظمیٰ کے حتمی فیصلہ تک سماعت روکی جاتی ہے ۔عدالت نے سپریم کورٹ کے ازخود نوٹس کی بنا پر سماعت غیر معینہ مدت تک ملتوی کردی۔عدالت نے اٹارنی جنرل کو معاونت کے لئے طلب کر رکھا ہے۔گورنر پنجاب نے سنگل بینچ کے فیصلے کی تشریح کے لئے درخواست دائر کی ہے، جس میں موقف اختیار کیا گیا ہے کہ سنگل بینچ نے الیکشن کمیشن کو گورنر پنجاب سے الیکشن کی تاریخ سے متعلق بات کرنے کا حکم دیا، گورنر پنجاب نے اسمبلی تحلیل کرنے کی سمری پر دستخط ہی نہیں کیے۔عدالتی فیصلے کی روشنی میں گورنر کیسے الیکشن کمیشن کےساتھ شیڈول کے اجرا کے لئے مشاورت کرسکتے ہیں، گورنر کا الیکشن کمیشن کے معاملات میں کوئی آئینی کردار نہیں ہے، گورنر کا عہدہ غیر سیاسی ہے جبکہ الیکشن کا معاملہ مکمل سیاسی ہے، عدالت اس نکتے کے مطابق اپنے فیصلے کی تشریح کرے۔
گورنر الیکشن کمشن سماعت ملتوی