نوابشاہ (این این آئی) نوابشاہ کی تحصیل دولت پور میں سکول وین حادثے کے گیارہ روز بعد برائٹ فیوچر سکول میں پیر سے تدریسی عمل شروع ہوگیا۔ افسردہ چہر ے کے ساتھ سکول داخل ہونے والے بچے اپنے ساتھیوں کے بچھڑنے پر آنسو نہ روک سکے۔ فضا سوگوار رہی 15 جنوری کو نوابشاہ کی تحصیل دولت پور میں برائٹ فیوچر سکول کی وین حادثے کا شکار ہوئی۔ حادثے میں 23 طلباء اور طالبات سمیت 26 زندگیوں کے چراغ بجھ گئے۔ سکول کو گیارہ روز کیلئے سوگ کے باعث بند کردیا گیا تھا۔ سکول پر اداسی کی فضا طاری رہی اور بچے اپنے بچھڑے ساتھیوں کو یاد کرکے غمزدہ دکھائی دیئے سکول وین حادثے میں زخمی ہونیوالے چھ بچے اور ایک لیڈی ٹیچر اب تک کراچی کے نجی ہسپتال میں زیر علاج ہیں۔ حادثے نے ہر کسی کو افسردہ کردیا تھا۔ ہر بچے کے لب پر دعائیں ہیں ہر کسی کا دل رو رہاہے کہ ان کے بہت سے پیارے ساتھی اب ان میں نہیں ہیں۔ کسی کو بہن کی جدائی کا دکھ ہے تو کوئی بھائی کے بچھڑنے پر غم زدہ ہے۔