سعودی عرب : برطانوی ریفری نے اذان کے دوران فٹبال میچ روک دیا

ریاض(سپورٹس ڈیسک) برطانوی فٹبال ریفری نے اذان کے احترام میں میچ روک کر مسلمانوں کے دل جیت لیے۔عرب میڈیا کے مطابق سعودی عرب میں سعودی کنگ فٹبال کپ کے دوران غیر مسلم ریفری مارک کلیٹن برگ اس وقت توجہ کا مرکز بن گیا جب اس نے اذان کی آواز سنتے ہی میچ میں وقفہ کردیا۔کنگ سلمان بن عبدالعزیز سٹی سٹیڈیم میں الفتح اور الفیح کے مابین میچ مقررہ وقت پر ایک ایک گول سے برابر تھا جس کو فیصلہ کن بنانے کیلئے 5 منٹ اضافی دیے گئے۔اضافی منٹس میں مقابلہ جاری تھا کہ مقامی مسجد سے اذان کی صدا بلند ہوئی جو کانوں پر پڑتے ہی ریفری نے فوری وسل بجاکر میچ روک دیا۔وقفہ ملنے پر کچھ پلیئرز آرام کی غرض سے گراؤنڈ سے باہر چلے گئے جبکہ بعض میدان میں بیٹھ کر خود کو تازہ دم کرنے لگے۔اذان ختم ہونے پر میچ دوبارہ شروع کیا گیا ‘میچ تو کوئی ٹیم نہیں جیتی تاہم ریفری نے سب کے دل جیت لیے، سٹیڈیم میں موجود شائقین نے مذہبی احترام کے اس غیر معمولی اقدام پر ریفری کو خراج تحسین پیش کیا۔غیرمسلم ریفری کی جانب سے اذان کا احترام کرنے پر نہ صرف سعودی حکام نے ان کی تعریف کی بلکہ دنیا بھر کے مسلمانوں نے ان کے لیے نیک خواہشات اور تمناؤں کا اظہار بھی کیا۔