پاکستانی پائلٹ نے اڑن طشتری جیسی چیز کی ویڈیو بنالی‘ تحقیقات شروع

اسلام آباد (خصوصی رپورٹر) رحیم یار خان میں دن کے وقت انتہائی روشن پراسرار چیز  کی ویڈیو سوشل میڈیا پر بہت تیزی سے وائرل ہو رہی ہے۔ ذرائع کا بتانا ہے کہ کراچی سے 23 جنوری کو لاہور کے لیے روانہ ہونے والی پی آئی اے  کی پرواز کے کپتان نے رحیم یار خان کی فضا میں آسمان پر انتہائی چمکدار چیز  دیکھی اور اسے اپنے کیمرے میں محفوظ کر لیا۔ ترجمان ائیرلائن عبداللہ خان کے مطابق پائلٹ نے شام چار بجے  رحیم یار خان کی فضا میں چمکدار چیز کو دیکھا، دن کی روشنی میں طیارے سے اس قسم کی چیز کا نظر آنا بہت غیرمعمولی ہے۔ ذرائع کے مطابق ممکنہ طور پر بین الاقومی خلائی سٹیشن یا سٹار لنک سیٹلائٹ کے نظر آنے کا امکان ہو سکتا ہے۔ ائیر لائن ذرائع کا کہنا ہے کہ چمکدار چیز کے اڑن طشتری ہونے کے حوالے سے کچھ نہیں کہا جا سکتا۔ جمع ویڈیو کی تفصیل جاننے کی کوشش کر رہے ہیں۔ آسمان پر موجود انتہائی روشن چیز کو رحیم یارخان میں بھی لوگوں نے دیکھا اور اس کی ویڈیو بھی بنائی۔