نیشنل انڈر 16 کرکٹ : درانی ‘حسنین‘طیب‘ہارون‘روحان کی سنچریاں 

لاہور (سپورٹس رپورٹر)ملتان میں جاری نیشنل انڈر 16 ٹورنامنٹ کے پہلے راؤنڈ میں سدرن پنجاب وائٹس، سندھ وائٹس اور کے پی وائٹس نے اپنے اپنے میچز جیت لیے۔ملتان کرکٹ سٹیڈیم میں کھیلے گئے میچ میں کے پی نے ناردرن کو 59 رنز سے شکست دیدی۔ اکفر درانی نے 109 رنز کی اننگز کھیلی۔ ریاض اللہ نے 84 اور محمد اویس 66 رنز بناکر آؤٹ ہوئے۔ جواب میں ناردرن کی ٹیم 224 رنز پر ڈھیر ہوگئی۔ ارسلان علی نے 58 رنز بنائے۔عادل وحید نے 4 وکٹیں حاصل کیں۔ سدرن پنجاب وائٹس نے سنٹرل پنجاب کو 8 وکٹوں سے ہرادیا۔ سدرن پنجاب نے علی حسنین کے ناقابل شکست 114 اور محمد فرحان کی 51 رنز کی اننگز کی بدولت 205 رنز کا ہدف 41.3 اوورز میں 2 وکٹوں پر حاصل کرلیا۔سنٹرل پنجاب نے طیب عارف کے 115 رنز کی بدولت مقررہ 45 اوورز میں 4 وکٹوں پر 204 رنز بنائے۔ سندھ نے بلوچستان کو 156 رنز سے ہرادیا۔ ہارون ارشد اور روحان خان کی 268 رنز کی شراکت کی بدولت سندھ نے 45 اوورز میں 4 وکٹوں  پر 313 رنز بنائے۔ ہارون ارشد نے 139 جبکہ روحان خان نے 109 رنز کی اننگز کھیلیں۔جواب میں بلوچستان کی پوری ٹیم 157 رنز پر ڈھیر ہوگئی۔ عثمان غنی 71 رنز بناکر آؤٹ ہوئے۔ ریحان شاہ اور شاہ زیب علی نے 3،3 وکٹیں حاصل کیں۔