اسلام آباد: وزیراعظم عمران خان نے بلوچستان کے علاقے کیچ میں پاک فوج کے 10 جوانوں کی شہادت پر دکھ اور افسوس کا اظہار کرتے ہوئے کہا ہے کہ شہیدفوجیوں کے خون کا ایک ایک قطرہ ملکی سلامتی کا ضامن ہے۔
اپنے تعزیتی پیغام میں وزیراعظم نے شہداء کے ورثاء سے ہمدردی کا اظہار کرتے ہوئے کہا کہ بزدل دشمن کو ایک مضبوط قوم کا سامنا ہے .جس نے پہلے بھی دہشت گردی کو شکست دی اور اب بھی اپنے عزم و حوصلے سے دہشت گردوں کو شکست دینگے۔
واضح رہے کہ بلوچستان میں دہشتگردوں کے ساتھ شدید جھڑپ میں پاکستانی فوج کے 10جوانوں نے جام شہادت نوش کیا۔آئی ایس پی آر کے مطابق دہشت گردوں نے 25 اور 26 جنوری کی درمیانی شب حملہ کیا۔آئی ایس پی آر کا کہنا ہے کہ پاک فوج اور دہشت گردوں کے مابین فائرنگ کا تبادلہ ہوا۔ فائرنگ کے تبادلے میں پاک فوج کے 10 جوان شہید ہو گئے جبکہ ایک دہشتگرد ہلاک ہوا اور متعدد زخمی ہوئے,3 دہشت گردوں کو گرفتار کر لیا گیا۔