بابراعظم کی کپتانی میں وقت کیساتھ بہتری آئیگی:رکی پونٹنگ

لاہور(سپورٹس رپورٹر)آسٹریلیا کے سابق کپتان رکی پونٹنگ نے بابر اعظم کی تعریف کرتے ہوئے کہا ہے کہ ان میں وہ صلاحیتیں ہیں جو ایک اچھے پلیئر کو عظیم پلیئر بناتی ہیں۔ بابر اعظم ٹیکنیکلی بہترین کرکٹر ہیں، وہ سپن اور فاسٹ بائولنگ کو بہترین کھیلتے ہیں اور ہر کنڈیشن میں ایڈجسٹ ہوجاتے ہیں۔بابر اعظم دیگر عظیم پلیئرز کی طرح کافی پختہ مزاج کے کھلاڑی ہیں، وہ ٹیسٹ فارمیٹ میں طویل اننگز کھیلتے اور ون ڈے میں اننگز پر حاوی رہتے ہیں۔ ٹیم کی ضرورت کے مطابق بابر اعظم کے رنز بنانے کی رفتار کو بدلنا بھی ان کی زبردست صلاحیت ہے۔ بابر اعظم کی بہترین کرکٹ کا سامنے آنا ابھی باقی ہے، اکثر بیٹسمین 30 سال کی عمر کے بعد ہی عروج حاصل کرتے ہیں۔ بابر اعظم میں مزید بہتری ہوگی، مجھے بابر کو بیٹنگ کرتا دیکھ کر کافی اچھا لگتا ہے، بابر کی کپتانی میں بھی وقت کیساتھ بہتری آئیگی۔ تجربے کیساتھ بابر اعظم کپتانی میں وہ مقام حاصل کرلیں گے جو بیٹنگ میں حاصل کیا۔ بابر اعظم کیریئر کے اختتام پر دنیا کے عظیم کھلاڑیوں میں شمار ہوں گے۔