روٹس ملینیم سکول نے بھٹو کرکٹ اکیڈمی کیخلاف نمائشی میچ جیت لیا

اسلام آباد (سپورٹس رپورٹر) بھٹو کرکٹ گراؤنڈ میں حمزہ کی شاندار باؤلنگ کے باعث روٹس ملینیم سکول نے بھٹو کرکٹ اکیڈمی کی انڈر 13- ٹیم کو ایک دوستانہ میچ میں 11رنز سے شکست دے دی۔ روٹس ملینیم سکول کے ڈائریکٹر اور پنجاب حکومت کے نگران وزیر چوہدری فیصل مشتاق نے میچ جیتنے پر روٹس ملینم سکول کرکٹ ٹیم کے پیٹرن ڈاکٹر نیعم تاج اور ہیڈ کوچ ظہور بھٹی کو مبارکباد اور ٹیم کپتان عبدالرحمٰن اور کھلاڑیوں کو شاباش دی۔ میچ میں روٹس ملینیم سکول نے پہلے بیٹنگ کرتے ہوئے مقررہ اوورز میں 94رنز بنائے۔ علی 40 اور طیب 30رنز کیساتھ ٹاپ سکورر رہے۔ بھٹو اکیڈمی کے ریحان نے 35 رنز دے کر تین اور حمزہ نے 28 رنز دے کر دو وکٹیں حاصل کیں۔ اپنی باری میں بھٹو کرکٹ اکیڈمی مطلوبہ ہدف حاصل نہ کرسکی اور پوری ٹیم 83 رنز بنا کر آؤٹ ہوگئی۔ روٹس ملینیم سکول کے حمزہ نے تباہ کن باؤلنگ کی اور صرف 18 رنز دے کر چار وکٹیں حاصل کیں جبکہ کیف نے 22 رنز دے کر تین کھلاڑیوں کو آؤٹ کیا۔ فاتح ٹیم کے وکٹ کیپر محمد نے بہترین وکٹ کیپنگ کی اور تین کیچ پکڑے، جبکہ علی اور ٹیم کے کپتان عبدالرحمٰن نے عمدہ فیلڈنگ کا مظاہرہ کیا۔ روٹس ملینیم سکول کے حمزہ کو مین آف دی میچ قرار دیا گیا۔