لاہور(نمائندہ سپورٹس) سینئر اور جونیئر ہاکی ٹیموں کیلئے نیاکوچنگ سیٹ اپ لانے کا فیصلہ کیا گیا ہے۔پاکستان ہاکی فیڈریشن کی نئی ٹیم انتطامیہ کا اعلان اگلے ہفتے کیا جائیگا، سینئرز اور نوجوان کوچز پر انحصار کی پالیسی اختیار کی جارہی ہے۔ دوسرے مرحلے میں فنڈز ملنے پر غیر ملکی کوچز کو بھی ٹیموں کیساتھ لگانے کی تجویز ہے۔ سعید خان، رشید جونیئر، اصلاح الدین، خواجہ جنید کو سینئر اور جونیئر ٹیموں کے ہیڈ کوچز کی ذمہ داری سونپی جاسکتی ہے، وسیم احمد اور سہیل عباس سے بھی رابطہ کیا گیا ہے۔ ذیشان اشرف، سمیر حسین، مدثر علی خان اور دانش کلیم کے نام بھی متوقع معاون کوچز میں شامل ہیں۔پی ایچ ایف حکام ایسا سیٹ اپ لانے کے خواہش مند ہیں، جس میں ماضی اور جدید ہاکی کا تجربہ رکھنے والے کوچز کو ٹیموں کے ساتھ ذمہ داریاں سونپی جائیں تاکہ ٹیموں کو انٹرنیشنل ایونٹس کے لیے تیار کرنے میں مدد مل سکے۔ چیئرمین سلیکشن کمیٹی منظور جونیئر آج کراچی میں ایاز محمود، وسیم فیروز اور خالد حمید کیساتھ میٹنگ کرکے کھلاڑیوں کے انتخاب پر مشاورت کریں گے۔ کیمپ میں نیشنل ہاکی چیمپئَن شپ کے بہترین 35 سے زیادہ پرفارمر کو مدعو کیا جائے گا۔ اولمپک کوالیفائنگ راونڈ ستمبر اکتوبر میں شیڈول ہے۔