فیروز والا‘ دوڑ لگاتی بسوں نے 2 بہنوں کی جان لے لی‘ چچا شدید زخمی 

فیروزوالہ (نامہ نگار) جی ٹی روڈ پر رانا ٹاؤن کے قریب دو بسوں کی دوڑ نے جواں سال دو بہنوں کی جان لے لی جبکہ حادثہ میں ان کا چچا بھی شدید زخمی ہو گیا۔ ہلاک ہونے والی دونوں میں سے ایک بہن کی چند ماہ بعد شادی ہونے والی تھی‘ حادثہ کے بعد ڈرائیورگاڑی چھوڑ کر فرار ہو گیا بتایا گیا ہے کہ بشیر ٹاؤن کے رہائشی سجاد احمد کی دو بیٹیاں 18 سالہ گڑیا سجاد اور  22 سالہ فروا سجاد اپنے چچا ریاض احمد کے ہمراہ موٹر سائیکل پر سوار ہو کر بشیر ٹاؤن سے  لاہور جا رہی تھیں جب وہ رانا ٹاؤن حیدر روڈ یوٹرن کے قریب پہنچے تو گجرانوالہ کی طرف سے لاہور جانے والی دو بسیں دوڑ لگا کر جا رہی تھیں، پیچھے سے آنے والی تیزرفتار کوسٹر بس بے قابو ہو کر موٹر سائیکل سواروں سے ٹکرا گئی جس کے  نتیجہ میں بس کے ٹائروں تلے آ کر دونوں سگی بہنیں گڑیا سجاد اور فروا سجاد موقع پر ہی جاں بحق ہو گئیں جبکہ ان کا چچا ریاض احمد شدید زخمی ہو گیا جسے ہسپتال داخل کرا دیا گیا۔ فیروز والا پولیس نے واقعہ کی رپورٹ درج کر لی۔ پولیس نے لاشیں ضروری کارروائی کے بعد ورثاء کے حوالے کر دیں جب دونوں بہنوں کی لاشیں گھر پہنچنے پر قیامت برپا ہو گئی۔