آج کے بچے کل کا روشن مستقبل ہیں، اس لیے انہیں تحقیق اورجستجو کا جذبہ پیدا کرکے سائنس کےمیدان میں ترقی حاصل کرکےملک وقوم کو قائد اوراقبال کا پاکستان بنانا ہوگا۔ بیگم مہنازرفیع

ان خیالات کا اظہار انہوں نے ایوان کارکنان لاہورمیں نظریاتی سمرسکول میں بچوں سے خطاب میں کیا۔ بیگم مہناز رفیع کا کہنا تھا کہ تعلیم سےانسان بنتاہے اورحضرت محمد صلی اللہ علیہ وسلم نے بھی یہی فرمایا تھا کہ دینی علم کے ساتھ ساتھ دنیاوی علم حاصل کرو چاہے اس کیلئے تمہیں چین بھی جانا پڑے ۔ انہوں نے بچوں سے کہا کہ اب علم حاصل کرکےملک کی بگڑی ہوئی حالت کو درست کرنا اور تقدیر بنانا آپ کا کام ہے۔مہناز رفیع کا کہنا تھا کہ علامہ اقبال نے نوجوانوں اوربچوں کواپنی شاعری میں جہد مسلسل کا درس دیا تھا۔
نظریاتی سمر سکول میں تحریک پاکستان کے مجاہد محمد ایوب کے صاحبزادے اورمعروف گلوکار عدیل برکی نے بھی شرکت کی۔عدیل برکی نے ملی نغمے گائےجسے بچوں اوراساتذہ سمیت سبھی نے بہت پسند کیا۔
عدیل برکی کا کہناتھاکہ یہ نظریاتی سمرسکول ایک دن ضرور پاکستان کا ایک بڑا سکول بن جائے گا۔ جس میں امیراورغریب اورفرقہ پرستی ،ذات پات کے فرق کی تمیز کے بغیر بچے تعلیم حاصل کریں گے۔ انہوں نے اس موقع پر صوفی شاعرمحمد بخش کا کلام بھی پیش کیا۔
عدیل برکی کا کہنا تھا کہ آج کی نسل سے ہونے والی کوتاہیوں کی بدولت وطن عزیز جن مشکلات کی گھڑیوں سے دوچار ہے ہمیں امید ہے کہ یہ بچے محنت ،دیانت داری ،سچائی اورلگن کی بدولت آنے والے کل میں ملک وقوم کیلئے ایک روشن مستقبل کا باعث بنیں گے۔