پی ٹی آئی کی الیکشن مہم کا آفیشل گانا فرحان سعید گائیں گے

اسلام آباد(کلچرل رپورٹر)سجنی فیم معروف گلوکار فرحان سعیدپی ٹی آئی کا آفیشل انتخابی گانا گائیں گے۔ فرحان سعید نے بنی گالا میں چیئرمین پی ٹی آئی عمران خان سے ملاقات کی اور الیکشن مہم 2018 کا آفیشل گانا گانے کے لیے ان پر اعتماد کرنے پر شکریہ ادا کیا۔فرحان سعید نے ٹوئٹر پر ملاقات کی تصاویر بھی شیئر کیں اور کہا کہ وہ عمران خان اور پی ٹی آئی کے شکرگزار ہیں کہ انتخابی مہم کا آفیشل گانا گانے کے لیے ان پر بھروسہ کیا گیا۔گلوکار نے مزید لکھا کہ وہ پی ٹی آئی کی سوشل میڈیا ٹیم کی کوششوں اور سپورٹ کو بھی سراہتے ہیں۔ انہوں نے کہا کہ نیا آفیشل سونگ کارکنوں اور ووٹروں کا لہو گرما دے گا ۔واضح رہے کہ فرحان سعید متعدد سپر ہٹ گانے گا چکے ہیں جن میں، سجنی، تھوڑی دیر، دل ہوا پنچھی، ہلکا ہلکا سرور اور دیگر شامل ہیں۔فرحان سعید گلوکاری کے ساتھ اداکاری میں بھی جوہر دکھاتے ہیں اور حال ہی میں ان کا رمضان کا خصوصی ڈرامہ سیریل سنو چندا ریکارڈ توڑ ہٹ ثابت ہوا ہے۔