اسلام آباد (نا مہ نگار)وفاقی وزیر اطلاعات و نشریات مریم اورنگزیب نے کہا ہے ہماری زبان ہی ہماری شناخت ہے، جدید دنیا میں زبانیں معدومیت کی جانب بڑھ رہی ہیں، زبانوں کے تحفظ کے لئے عالمی سطح پر اقدامات اٹھانے کی ضرورت ہے ۔ یہ بات انہوں نے  علامہ اقبال اوپن یونیورسٹی کے زیر اہتمام ''لینگوئج ڈاکومنٹیشن'' کے موضوع پر چار روزہ انٹرنیشنل ٹریننگ ورکشاپ کے افتتاحی سیشن سے خطاب کرتے ہوئے کہی۔ وفاقی وزیر اطلاعات نے علامہ اقبال اوپن یونیورسٹی کو خراج تحسین پیش کرتے ہوئے کہا کہ زبان مختلف ثقافتوں اور معاشروں کو اکٹھا کرتی ہے، زبان کی ڈاکومنٹیشن جیسے اہم موضوع پر تربیتی ورکشاپ کا انعقاد خوش آئند امر ہے،  پاکستان میں تقریباً 80 زبانیں بولی جاتی ہیں جن میں سے 26 زبانیں معدومیت کی جانب بڑھ رہی ہیں۔  زبان نہ صرف معاشرے، ثقافت، تاریخ کو اپنی اندر سمو لیتی ہے بلکہ اس سے ایک ایسا سماجی تعلق جنم لیتا ہے جو قوموں کی شناخت کا باعث بنتا ہے۔ انہوں نے کہا کہ حکومت علامہ اقبال اوپن یونیورسٹی کو لنگوئسٹک مینجمنٹ سسٹم کے لئے ہر ممکن تعاون فراہم کرے گی۔ وفاقی وزیر اطلاعات نے کہا کہ وزیراعظم شہباز شریف خود بھی چھ عالمی زبانیں بولتے ہیں، انہیں زبان کی اہمیت کا بخوبی اندازہ ہے۔ انہوں نے کہا کہ زبان سماجی تعلق اور رابطے کو موثر بناتی ہے، یہ ایک ایسی طاقت ہے جو مختلف ثقافتوں کو تقویت دیتی ہے۔ انہوں نے کہا کہ زبانوں کو محفوظ کرنے میں ہی اقوام کی بقا ہے، اسی میں ہماری قومی شناخت ہے۔ انہوں نے کہا کہ بدقسمتی سے ہمارے نصاب میں ان تمام چیزوں کا فقدان ہے، ہمیں اپنی نوجوان نسل اور بچوں کو زبانوں کی اہمیت سے آشنا کرنا ہوگا، ہمیں اپنی زبان کے ساتھ اپنے بچوں کے تعلق کو بڑھانا ہوگا۔  حکومت سنگل نصاب کے لئے کوشاں ہے، اس پر ہم موثر طریقے سے آگے بڑھ رہے ہیں۔ انہوں نے کہا کہ علامہ اقبال اوپن یونیورسٹی کے اس اقدام کو ہم نصاب میں شامل کر سکتے ہیں، ہمیں اپنی زبانوں کو محفوظ بنانا ہوگا، اسی سے ہمارے کلچر اور شناخت کو تقویت مل سکتی ہے۔