کھلاڑیوں میں کوآرڈی نیشن ‘پلان پر عملدرآمد کا فقدان نظر آیا : وہاب ریاض

لاہور(سپورٹس رپورٹر)آئی سی سی ٹی ٹونٹی ورلڈ کپ میں ناقص کارکردگی پر پاکستان کرکٹ ٹیم کے سینئر منیجر وہاب ریاض نے رپورٹ پی سی بی کو جمع کرا دی۔ذرائع کے مطابق وہاب ریاض نے رپورٹ میں ورلڈ کپ میں ٹیم کی ناقص کارکردگی کی وجوہات بتائیں۔تفصیلی رپورٹ وہاب ریاض نے ڈائریکٹر عثمان واہلہ کو جمع کرائی، منیجر منصور رانا کی بھی رپورٹ اس کے ساتھ شامل  ہے۔ وہاب ریاض کی رپورٹ میں کہا گیا ہے کہ قومی ٹیم نے سکل فل کرکٹ نہیں کھیلی ، کھلاڑیوں کو اپنی مہارت کے مطابق کھیلنا چاہیے تھا ، کھلاڑیوں میں کو آرڈینیشن اور پلان پر عمل درآمد کا فقدان نظر آیا۔ کھلاڑیوں کو ایک کوآرڈینیشن اور جذبے کیساتھ کھیلنا چاہیے تھا، بھارت کیخلاف میچ میں جیت کے ارادے کو نہیں چھوڑنا چاہیے تھا۔رپورٹ میں مستقبل میں کرکٹ کی بہتری سے متعلق تجاویز بھی دیں۔ کھلاڑیوں کے کیمپ زیادہ سے زیادہ لگنے چاہیے تھے اور کرکٹرز کے زیادہ سے زیادہ ٹورز کا اہتمام ہونا چاہیے، کرکٹرز کو ڈومیسٹک کرکٹ میں  زیادہ حصہ لینا ہوگا، سکلز اور فٹنس کو مزید بہتر بنانے کیلئے اقدامات کرنا ہوں گے۔