اسلام آباد (نمائندہ خصوصی) بلاول بھٹو  سے پارلیمنٹ ہاؤس میں پی پی پی خیبر پی کے کے نائب صدر ساجد حسین طوری کی ملاقات ہوئی جس میں صوبے کے تنظیمی و سیاسی معاملات پر تبادلہ خیال کیا گیا۔  رکن قومی اسمبلی شرمیلا فاروقی اور حشام ریاض، سینٹرل ایگزیکٹو کمیٹی کے رکن قمر زمان کائرہ نے ملاقات کی۔ اس موقع پر پنجاب کی سیاسی صورت حال پر بات چیت کی گئی۔ سابق رکن قومی اسمبلی رضا ربانی کھر  سے کوٹ ادو کی سیاسی صورت حال پر گفتگو ہوئی۔ سرگودھا کے ڈویژنل صدر تسنیم قریشی نے سیاسی و تنظیمی صورت حال پر بات چیت کی۔ پی پی پی لودھراں کے رہنما اقبال خان راندھو  نے علاقے کی  سیاسی و تنظیمی صورت حال پر تبادلہ خیال  کیا۔ پی پی پی وہاڑی کے رہنما محمود حیات ٹوچی خان  سے گفتگو میں  میلسی، وہاڑی کی سیاسی صورت حال پر بات چیت ہوئی۔ دوسری جانب بلاول بھٹو زرداری نے  اسلام آباد میں پارٹی کی تنظیم کو فعال کرنے پر زور دیا اور پارٹی کی از سر نو تنظیم سازی کا ٹاسک انچارج سینٹرل سیکرٹریٹ  سید سبط الحیدر بخاری  کو سونپ دیا۔