لاہور (سپورٹس رپورٹر) 2013ءکے سنٹرل کنٹریکٹ اور آئی سی سی چیمپئنز ٹرافی کے ابتدائی 30 ناموں کو حتمی شکل دینے کے لئے قومی سلیکشن کمیٹی کا اجلاس آج قذافی سٹیڈیم لاہور میں منعقد ہوگا۔ سلیکشن کمیٹی اس سے قبل باہمی مشاورت کے بعد سنٹرل کنٹریکٹ اور آئی سی سی چیمپئنز ٹرافی کے ابتدائی کھلاڑیوں کی فہرست مرتب کر کے چیئرمین پی سی بی کو بھجوا چکی ہے تاہم لاہور میں جاری ٹی ٹونٹی سپرایٹ ٹورنامنٹ اور حال ہی میں ختم ہونے والے دورہ جنوبی افریقہ میں کھلاڑیوں کی کارکردگی کا جائزہ لیکر فہرست کو نئے سرے سے مرتب کیا جائے گا۔ سلیکشن کمیٹی نے 2013ءکے سنٹرل کنٹریکٹ کے لئے 33 کھلاڑیوں کے ناموں کو فائنل کر رکھا ہے۔ ذرائع کے مطابق نئی سنٹرل کنٹریکٹ کی فہرست میں سابق کپتان شاہد خان آفریدی اور شعیب ملک کو بی کیٹگری جبکہ کامران اکمل اور وہاب ریاض کو سی کیٹگری میں رکھنے کی سفارش کی گئی ہے جبکہ آل را¶نڈر عبدالرزاق، عمران نذیر، یاسر عرفات، حماد اعظم اور بابر اعظم سلیکشن کمیٹی کا اعتماد حاصل نہیں کر سکے ہیں تاہم چیئرمین پی سی بی ذکاءاشرف کی صوابدید پر ہے کہ وہ ان کھلاڑیوں کے لئے کوئی ماہانہ اعزازیہ کا اعلان کرتے ہیں یا نہیں۔ 2013ءکے لئے چیئرمین پی سی بی ذکاءاشرف کو پیش کی جانے والی فہرست کے مطابق اے کیٹگری میں محمد حفیظ، مصباح الحق، عمر گل، سعید اجمل، یونس خان۔ بی کیٹگری میں شاہد خان آفریدی، شعیب ملک، عمر اکمل، اسد شفیق، عمران فرحت، ناصر جمشید اور عبدالرحمان جبکہ سی کیٹگری میں اظہر علی، کامران اکمل، وہاب ریاض، احمد شہزاد، محمد عرفان، جنید خان، سہیل تنویر، رضا حسن اور ذوالفقار بابر شامل ہیں۔ سلیکشن کمیٹی کی جانب سے بعض کھلاڑیوں کو ماہانہ اعزازیہ کے لئے رکھا گیا ہے جس میں فاسٹ با¶لر محمد سمیع، خرم منظور، احسان عادل، راحت علی، خالد لطیف، محمد طلحہ، سمیع اسلم اور ضیاالحق شامل ہیں۔ ذرائع کے مطابق بعض سینئر کھلاڑیوں کی جانب سے سلیکشن کمیٹی کو سفارشیں کرائی گئی ہیں کہ انہیں ٹاپ کیٹگری میں شامل کیا جائے۔ قومی سلیکشن کمیٹی کے سربراہ اقبال قاسم آج صبح کراچی سے لاہور پہنچیں گے۔ بعدازاں سلیکشن کمیٹی کے دیگر ارکان سلیم جعفر، اظہر خان کے ساتھ مشاورت کر کے سنٹرل کنٹریکٹ کے ناموں کو زیر غور لایا جائیگا۔