ایران کیخلاف مزید پابندیاں ، امریکہ نے 9شخصیات اور 16اداروں کو بلیک لسٹ کردیا

واشنگٹن(این این آئی)امریکا کی وزارت خزانہ نے ایران کے 16 اداروں اور 9 شخصیات پر دفاع، جدت اور تحقیق کے شعبوں میں پابندیاں عائد کردی ۔ اس کے علاوہ امریکی حکومت کی طرف سے ترکی کے بعض اداروں کو بھی بلیک لسٹ کر دیا ہے۔عرب ٹی وی کے مطابق امریکا کی طرف سے ایرانی اداروں اور شخصیات کو پابندیوں کا نیا ہدف بنایا ہے۔ ان میں بنک، مالیاتی ادارے اور دیگر تنظیمیں شامل ہیں۔ پابندیوں کا شکار ہونے والے اداروں میں اطلس جیولری کمپنی اور انصار بنک شامل ہیں۔امریکی وزارت خزانہ کا کہنا تھا کہ اطلس کمپنی اور انصار بنک ایرانی پاسداران انقلاب کے ماتحت کام کرتے ہیں اور ان کی سرگرمیاں ترکی میں بھی موجود ہیں۔ مجموعی طورپر یہ ادارے اور شخصیات ایک ارب ڈالر کی رقوم ایران کو منتقل کرتے ہیں۔ امریکا کی طرف سے جن افراد پر پابندیاں عاید کی گئی ہیں وہ الصرافہ کمپنی اور انصار بنک کے ساتھ منسلک ہیں۔ ان میں سے دو ڈائریکٹرز عہدے کے افسران شامل ہیں۔امریکی وزارت خزانہ کے معاون شیگل مانڈلکیر کا کہنا تھاکہ صرافہ کمپنی اور انصار بنک دنیا کے مالیاتی نظام کو دھوکا دینے کے ایرانی مہرے ہیں جو عالمی پابندیوں سے بچتے ہوئے ایران کو رقوم کی متنقلی اور دیگر سہولیات کی فراہمی میں ملوث ہیں۔