لاہور(سپورٹس رپورٹر)پاکستان فیڈریشن بیس بال کے زیر اہتمام پاکستان اور ملائیشیا کی ویمن بیس بال ٹیموں کے درمیان تین میچوں کی سیریز کا آغاز ہو گیا، افتتاحی میچ میں میزبان پاکستان نے مہمان ملائیشیا ٹیم کو صفر کے مقابلے میں 12 سکور سے شکست دی۔ پاکستان ویمن ٹیم نے تین میچوں کی سیریز میں ایک صفر کی برتری حاصل کر لی۔ بحریہ ٹاون لاہور میں منعقدہ سیریز کا افتتاح پاکستان فیڈریشن بیس بال کے چیئرمین شوکت جاوید نے صدر فیڈریشن فخر شاہ اور ملائیشیا بیس بال فیڈریشن کے صدر ساز علی نے کیا۔ پاکستان ویمن بیس بال ٹیم کی کھلاڑیوں نے شاندار کھیل پیش کیا اور صفر کے مقابلے میں پاکستان کو بارہ سکور سے کامیابی دلائی۔ زینب ریاض اور مدیحہ نے تین تین سکور کیے، آسیہ نے دو جبکہ حمیرا، زاہدہ، نورینہ اور عائشہ نے ایک ایک سکور کیا۔ پاکستان اور ملائیشیا کی ویمن ٹیموں کے درمیان سیریز کا دوسرا میچ آج کھیلا جائیگا۔