عمران خان پسند کے امپائر کی موجودگی میں کھیلنے کے عادی: رہنما پیپلز پارٹی

کراچی (نیوز ڈیسک+ این این آئی) صوبائی وزیر سید ناصر حسین شاہ نے شیخ رشید کے بیان پر ردعمل دیتے ہوئے کہا کہ شیخ رشید کی کوئی حیثیت نہیں کہ وہ چیئرمین بلاول بھٹو کو وارننگ دے اور کیا عمران خان کو لائسنس ملا ہوا ہے کہ وہ سب کو گالیاں دیتے رہیں۔ اگر عمران خان کو کوئی جواب دے تو شیخ رشید کو کیا اعتراض ہے۔ عمران پسند کے امپائر کی موجودگی میں کھیلنے کے عادی ہیں‘ آج پی ٹی آئی کے جلسے کی کوریج بھی پسند کے سرکاری چینل کو ہی دی گئی ہے۔ پرائیویٹ چینلز کو چاہئے کہ عمران خان کے جلسے کی کوریج نہ کریں۔ شیخ رشید روزانہ سندھ میں گورنر راج کی بات کر کے کس کو رسوا کرنا چاہتے ہیں۔ انہوں نے کہا کہ شیخ صاحب! عمران خان کے پاؤں تلے پچ ہی نہیں رہی تو کیسے آخری بال تک کھیلیں گے۔  شازیہ مری نے کہا شیخ رشید ملک کے وزیر داخلہ ہیں یا گلی کے غنڈے، سب کو پتا ہے یہ کتنے بڑے طرم خان ہیں۔ شیخ رشید کی پریس کانفرنس پر شازیہ مری نے ردعمل دیتے ہوئے کہا کہ گیدڑ بھبکیاں نہ دیں اور دھمکیاں اپنے گھر میں سنبھال کر رکھیں۔ انہوں نے کہا کہ شیخ رشید حالات کو تبدیل ہوتا دیکھ کر پتلی گلی سے نکل جائیں، شیخ رشید کی سیاست آمروں کے بوٹ پالش سے شروع اور سلیکٹڈ کی جوتیاں اٹھانے پر ختم ہوتی ہے۔