کوہاٹ میں طوفان‘ دیواریں اور درخت گرنے سے 4بچے جاں بحق

کوہاٹ (نامہ نگار)کوہاٹ میں شدید آندھی اور طوفان ‘دیواریں اور درخت گرنے سے چار بچے جاں بحق‘ متعددافرادزخمی ہو گئے۔ کوہاٹ اور گردونواح میں شدید آندھی اور طوفان کے باعث متعدد درخت اکھڑ گئے جبکہ منگل بی بی میں مکان کی دیوار گرنے کے نتیجے میں پانچ سالہ توفیق نامی بچہ ملبے تلے دب کر جاں بحق ہوگیا۔ علاوہ ازیں جرما کے علاقہ تنگی بانڈہ میں دیوار گرنے سے دو بچے لقمان اور رفعت بی بی جاں بحق ہوگئے جبکہ علاقہ جرما میں ہی خواصی بانڈہ روڈ پر گھر کی دیوار گرنے سے ایک بچہ ثاقب جاں بحق جبکہ دوسرا زخمی ہو گیا دیگر علاقوں میں بھی متعدد افراد کے زخمی ہونے کی اطلاعات ہیں۔ طوفان کے نتیجے میں پنڈی روڈ اور بائی پاس روڈ پر متعدد بجلی کے کھمبے گرنے سے بجلی کی سپلائی میں تعطل پیدا ہوگیا اور مختلف علاقوں میں بجلی سپلائی تقریباً سات گھنٹے تک معطل رہی۔